Sot qorshaǵan ortany lastaǵan kásipkerden 1 mlrd. jýyq teńge óndirdi - BQO
ORAL. QazAqparat - Zelenov aýdandyq №2 soty qorshaǵan ortany qasaqana lastaǵany úshin «Munaıavtotrans» JShS dırektory Aslan Muqanovqa qatysty úkim shyǵardy.
BQO sotynyń baspasóz qyzmetinen túsken málimetke qaraǵanda, kásipker 2010 jyldyń naýryzynda jer qoınaýyn paıdalanýshy «ÝralOılEndGaz» JShS-men munaı qaldyqtaryn shyǵarý jáne joıý jóninde kelisimshartqa otyrǵan. Alaıda is basqasha órbip, zııandy qaldyqtar polıgonǵa jetkizilmeı, Zelenov aýdany Rýbejın, Darııan aýyldary mańyna tógilgen. 2010-2011 jyldary shyǵarylǵan qatty qaldyqtar 946 tekshe metr jáne 2867 tonnaǵa jetken. Suıyq qaldyqtar kólemi 3493 tekshe metrdi quraǵan.
Jalpy keltirilgen shyǵyn kólemi - 911778912 teńge.
Sot ekologııalyq qylmysqa barǵany úshin A.Muqanovty QR 278-baby 2-bóligi, 325-baby 3-bóligi jáne 228-baby boıynsha aıypty dep tanyp, oǵan úsh jyl bas bostandyǵynan aıyrý jazasyn belgiledi. Alaıda «QR memlekettik táýelsizdiginiń 20 jyldyǵyna baılanysty raqymshylyq týraly» Zańynyń 4-babyn qoldana otyryp, jazasyn óteýden bosatty. Sonymen qatar sottalýshydan memleket paıdasyna 911778912 teńge jáne 27353367 teńge memlekettik baj salyǵy óndirildi.
