Sot «Qorǵastaǵy» adam ólimine qatysty isti 22 tamyzda qaraıdy
TALDYQORǴAN.QazAqparat - «Qorǵastaǵy» adam ólimine qatysty istiń basty sot otyrysy 22 tamyzǵa belgilendi. Protsess saǵat 11-00 de Taldyqorǵan qalasyndaǵy Almaty oblysynyń qylmystyq ister jónindegi mamandandyrylǵan aýdanaralyq sotynda qaralady, dep habarlaıdy QazAqparat tilshisi.
Bıyl maýsymnyń tórtinde bolǵan qandy oqıǵaǵa baılanysty Panfılov aýdanynyń turǵyny D. Káripjanov aıyptalyp otyr. 22 jastaǵy kúdikti QR QK 99-baby birinshi tarmaǵy, ıaǵnı «Adam óltirý» faktisi boıynsha aıyptalýda. Ol óziniń tanysy Q. Tólegenovpen ózara sózge kelispeı, onyń keýde tusyna pyshaq suǵyp alǵan. 25 jastaǵy azamat alǵan jaraqatynan keıin Jarkenttegi aýrýhanaǵa jetpesten kóz jumdy.
Esterińizge sala keteıik, qandy oqıǵa Almaty oblysyndaǵy «Qorǵas» shekara mańy yntymaqtastyq halyqaralyq ortalyǵynyń aýmaǵynda boldy.
Adam óltirý oqıǵasy beınebaqylaý kamerasyna túsip qalǵan bolatyn.
