Sot Qorǵanys mınıstriniń buıryǵyn zańsyz dep tanydy
Sot tarapynan anyqtalǵany, talapker Qazaqstan Respýblıkasy Qarýly Kúshteriniń Generaldyq shtabynda jumyldyrý-uıymdastyrý deprtamentiniń bastyǵy bolyp qyzmet atqarǵan.
Talapkerdiń gospıtalda statsıonarlyq em qabyldaý kezinde, QR Qorǵanys mınıstriniń buıryǵymen atqaryp júrgen qyzmetinen bosatylyp, Qorǵanys mınıstriniń qaramaǵyna shyǵarylǵan.
Osyǵan baılanysty sot otyrysynda talapker QR Qorǵanys mınıstriniń buıryǵyn zańsyz dep tanyp, qyzmetine qaıta qalpyna keltirilýin, bes aı májbúrli bos júrgen ýaqyty úshin ótemaqy óndirýin jáne 500 myń teńge moraldyq shyǵyndy óteýdi suraǵan. Sebebi, zańda kózdelmegen negizder boıynsha jáne áskerı qyzmetkerdiń basqa qyzmetke aýysýy týraly kelisiminsiz Qorǵanys mınıstriniń qaramaǵyna shyǵarylǵan.
QR Qorǵanys mınıstriniń buıryǵy mazmunyn zerdeleý barysynda, talapker eshbir negizsiz atqaryp otyrǵan laýazymynan bosatylyp, mınıstrdiń qaramaǵyna shyǵarylǵan, oǵan qosa buıryq eshbir quqyqtyq normalarǵa siltemesiz jáne dáleldeýsiz jasalǵany anyqtaldy.
Jaýapkerdin ókili sot otyrysynda, talapkerdiń komandır qaramaǵyna shyǵarylýyn negizdeıtin, qandaı da bir basqa qujattar joq ekenin moıyndaǵan.
Sonymen birge, «Áskerı qyzmet jáne áskerı qyzmetshilerdiń mártebesi týraly» QR Zańynda áskerı qyzmetshilerdiń komandır qaramaǵynda bolýynyń tolyq negizdemeleri kózdelgen, alaıda mundaı negizder buıryq shyǵarý barysynda bolmaǵan.
Osylaısha, talapker atqaryp otyrǵan laýazymynan bosatylyp, komandır qaramaǵyna shyǵarylýy Zań talaptarynyń buzylyp jasalǵany sot arqyly naqty anyqtalǵan.
Sot sheshimimen, azamat M-niń talap aryzy ishinara qanaǵattandyrylyp, azamat M. aldyńǵy qyzmetine qaıta qalpyna keltirildi. «Qazaqstan Respýblıkasy Qorǵanys mınıstrligi» MM-nen májbúrli bos júrgen ýaqyty úshin 1 640 582 teńge ótemaqy jáne moraldyq shyǵyn retinde 50 myń teńge azamat M. paıdasyna óndirildi.
Sheshim zańdy kúshine engen joq.
