Sot QazTAG-tyń eks-dırektory Áset Mataevty basqa kolonııaǵa aýystyrmady
TALDYQORǴAN. QazAqparat - 5 jylǵa sottalǵan «QazTAG» aqparat agenttiginiń burynǵy bas dırektory Áset Mataev sotqa ótinish túsirip, ózin basqa kolonııaǵa aýystyrýdy suraǵan bolatyn. Sot onyń ótinishin qanaǵattandyrmady, dep habarlaıdy QazAqparat tilshisi.
Almaty oblystyq sotynyń baspasóz qyzmetiniń málimetinshe, Áset Mataev ózin qaýipsizdik deńgeıi barynsha tómen mekemege aýystyrýdy suraǵan. Búginde sottalýshy jazasyn Qapshaǵaı qalasy Zarechnyı kentindegi LA-155/14 jalpy rejimdegi kolonııasynda óteýde. Qapshaǵaı qalalyq soty onyń ótinishin qanaǵattandyrmady.
Esterińizge sala keteıik, 2016 jyldyń 3 qazanynda Astana qalasyndaǵy Esil aýdandyq sotynda «QazTAG» aqparat agenttiginiń bas dırektory qyzmetin atqarǵan Áset Mataev pen Qazaqstan Jýrnalıster odaǵynyń tóraǵasy Seıitqazy Mataevqa sot úkimi shyǵaryldy. Mataevtarǵa «asa iri kólemdegi bıýdjet qarajatyn urlady», «salyq tóleýden jaltardy» degen aıyptar taǵyldy. Nátıjesinde, Seıitqazy Mataev 6 jylǵa, al Áset Mataev 5 jylǵa sottaldy. Sondaı-aq Á.Mataevtyń dúnıe-múlkin tárkileýge úkim etildi.
Sotqa deıingi tergeý nusqasy boıynsha, Mataevtardyń barlyq qylmystyq is-qımyldaryn qosa eseptegende memleketke 529 mln teńgeden astam zııan kelgen.
