Sot qazaq tazysynyń patentin joqqa shyǵardy
ASTANA. KAZINFORM — Elorda soty qazaq tazysyna berilgen patentti jaramsyz dep tanydy.
Qazaqstan kınologter odaǵy men Ekologııa jáne tabıǵı resýrstar mınıstrligi «Qansonar» ańshylar qoǵamdyq birlestiginiń patentin jaramsyz dep taný týraly talap qoıyp, sotqa júgingen. Bul týraly Astana qalalyq soty habarlaıdy.
Áriden bastasaq, 2024 jyly 30 jeltoqsanda Qazpatent ulttyq zııatkerlik menshik ınstıtýty «Qansonar» birlestigine «Qazaqtyń tazy ıt tuqymy» selektsııalyq jetistigine patent bergen. Alaıda, sot barysynda patent berýdiń mańyzdy sharttaryn buzý faktileri anyqtaldy. Tazy tuqymy — qazaqtyń kóne ıt tuqymy jáne buǵan deıin Qazaqstan Respýblıkasyna halyqaralyq deńgeıde tirkelgen.
Sot anyqtaǵandaı, 2023 jyly kınologter odaǵynyń ótinishi negizinde júrgizilgen zertteýdiń (sonyń ishinde medıtsınalyq, genetıkalyq) nátıjeleri boıynsha FCI halyqaralyq kınologııalyq federatsııa oń qorytyndy shyǵaryp, onyń negizinde FCI-diń bas komıteti «Qazaqtyń tazy tuqymyn» taný týraly sheshim qabyldap, Qazaqstan Respýblıkasyn onyń shyqqan eli retinde resmı túrde bekitken.
— Sondyqtan «Qazaq tazysy» jańa tuqym emes, sebebi ol jańa nárselerdiń sharttaryna saı kelmeıdi, sonymen qatar jaýapkerge derbes ejelgi qazaq tuqymy retinde patent berilmes buryn zańdy túrde bekitilgen, — deıdi elorda sotynan.
Sondaı-aq sottyń aqparatynda berilgen patentti moıyndaý sebebi de túsindirilgen.
— Patent ıesi atalǵan tuqymdy ıtterdi (kúshikterdi) kóbeıtýge, ósirýge jáne satýǵa, asyl tuqymdy materıaldy eksporttaýǵa jáne ımporttaýǵa aıryqsha quqyq beredi jáne respýblıka boıynsha basqa ıt ıeleri men ósirýshilerge qatysty mundaı quqyqtardy shekteıtinin málimdeıdi. Al, bul shekteýler ıtterdiń damýy men tanymal bolýyn qıyndatyp, erkin qoljetimdilikti shekteıdi. Bul ulttyq múddege qaıshy keledi jáne genetıkalyq qordyń saqtalýyna qaýip tóndiredi, — dep tarqatylǵan habarlamada.
Atalǵan shekteýler «Janýarlar dúnıesin qorǵaý, ósimin molaıtý jáne paıdalaný týraly» zańnyń normalaryna tikeleı qaıshy keledi, sebebi zańǵa saı qazaqy ıt tuqymyn saqtaý jáne ósimin molaıtý memleket baqylaýynda.
— Joǵaryda atalǵan jaıttardyń negizinde sot sheshimimen patentti jaramsyz dep taný týraly talap qanaǵattandyryldy, — delingen sot sheshiminde.
Sheshim zańdy kúshine engen joq.
Eske sala ketsek, jyl basynda Qazpatent ulttyq zııatkerlik menshik ınstıtýty qazaqy ıt patent alǵany týraly habarlaǵan edi.