Sot Qaırat Boranbaevty úıqamaqta ustaýdan bas tartty
«Qatysýshylardyń pikirin tyńdaǵannan keıin sot kelesi qorytyndyǵa keldi. QR Qylmystyq-protsestik kodeksiniń 153-babyna sáıkes, qajettilik bolmaǵan kezde nemese atalǵan kodekstiń 136, 138-baptarynda kózdelgendeı mán-jaı ózgergen kezde bultartpaý sharasy joıylady. Astana qalasynyń mamandandyrylǵan aýdanaralyq tergeý sotynyń 2022 jylǵy 17 naýryzdaǵy qaýlysymen Boranbaev pen Nahanovqa qatysty qamaýda ustaý túrindegi bultartpaý sharalaryna sanktsııa jarııalandy», - dedi №2 Saryarqa sotynyń sýdıasy Nazgúl Bapaqova.
Onyń aıtýynsha, Astana sotynyń qylmystyq ister jónindegi apellıatsııalyq sot alqasynyń qaýlysy joǵaryda atalǵan qaýly ózgerissiz qaldyrdy.
«Qorǵaýshylardyń ótinishinde baıandalǵan dálelder boıynsha Boranbaev pen Nahanovqa qatysty bultartpaý sharasyn ózgertýge negiz joq. Sottalýshynyń densaýlyǵy syr bergen jaǵdaıda qamaý ornyndaǵy medıtsınalyq beketke júginýge quqyly. QR Qylmystyq-protsestik kodeksiniń 147-baby 1-bóligine sáıkes kúzetpen ustaý bultartpaý sharasy retinde sýdıanyń sanktsııasymen jáne qylmys jasaýda zańmen 5 jyldan astam merzimge bas bostandyǵynan aıyrý túrindegi jaza kózdelgen sottalýshylarǵa qatysty ǵana qoldanylady», - dep atap ótti sýdıa.
«Sot qylmystyq-protsestik kodekstiń 324, 344 baptaryn basshylyqqa ala otyryp, Boranbaev pen Nahanovty qamaýda ustaýdy ózgertý týraly ótinishti oryndaýdan bas tartýdy qaýly etti», - dep tolyqtyrdy N. Bapaqova.
Eske salsaq, jýyrda Qarjylyq monıtorıng agenttigi «AzııaGazChýndja» JShS quryltaıshylary Qaırat Boranbaev pen Roman Nahanovqa jáne «Qazaq Gaz» AQ Basqarma tóraǵasynyń burynǵy orynbasary Taır Januzaqqa qatysty isti tergeýdi aıaqtady. Olarǵa suıytylǵan munaı gazyn satyp alý kezinde 14,5 mlrd teńge urlaý jáne qylmystyq kiristerdi zańdastyrý faktileri boıynsha aıyptar taǵylýda.
Buǵan deıin agenttik Qaırat Boranbaevtyń ústinen kvazımemlekettik sektorda asa iri kólemde qarajat jymqyrý faktisimen is qozǵap, ızolıatorǵa qamaǵan bolatyn.
Qazirgi ýaqytta iri mólsherde, onyń ishinde shetelde qylmystyq kiristi zańdastyrý belgileri bar neǵurlym rezonanstyq isterdi tergep-tekserý erekshe baqylaýda.
