Sot qaýlysyn ishimdik iship buzǵan atyraýlyq 20 táýlikke qamaldy

ATYRAÝ. KAZINFORM – Atyraý qalasynyń turǵyny naýryz aıynda sot qaýlysymen alkogoldik ishimdik ishýge tyıym salý jónindegi erekshe talapty buzǵan. Sot qaýlysymen er adam 20 táýlikke ákimshilik qamaýǵa alyndy. 

Atyraý qalasynyń ákimshilik quqyq buzýshylyqtar jónindegi mamandandyrylǵan sotynda QR Ákimshilik quqyq buzýshylyq týraly kodeksiniń 669-babynyń 3-bóligi boıynsha ákimshilik quqyq buzýshylyq týraly is qaraldy. 

– Atyraý qalasynyń turǵyny I.-ǵa sot qaýlysymen 1 jyl merzimge alkogoldik ishimdikterdi tutynýǵa tyıym salý túrindegi erekshe talaptar belgilengen. Alaıda 2025 jyldyń naýryz aıynda turǵylyqty meken-jaıyn tekserý kezinde I.-dyń alkogoldik ishimdik ishken kúıde bolǵany anyqtalǵan. Osylaısha ol sottyń qaýlysyn buzǵan, - dep habarlady atalǵan sottan. 

I.-dyń kinási ákimshilik quqyq buzýshylyq týraly jáne saýalnama hattamalarymen, sot qaýlysymen jáne basqa da is materıaldarymen rastaldy.

– Sot qaýlysymen I. ákimshilik quqyq buzýshylyq jasaǵany úshin kináli dep tanyldy. Oǵan 20 táýlikke ákimshilik qamaqqa alý túrindegi jaza qoldanyldy, - dep málim etti sottan.

Sot qaýlysy zańdy kúshine endi. 

Eske sala ketelik, buǵan deıin Atyraýda jyl basynan beri 100 myńǵa jýyq quqyq buzýshylyq anyqtalǵanyn jazǵan edik.