Sot Qaraǵandydaǵy úsh rıeltorlyq agenttiktiń dırektoryn qamaýǵa aldy
QARAǴANDY. QazAqparat - «Pozıtıv», «Shyǵys» jáne «Kvartırnyı vopros» jyljymaıtyn múlik agenttikteriniń dırektorlary páterge qatysty alaıaqtyq jasap, 40-tan asa qaraǵandylyq turǵyndy aldap soqty degen kúdikpen eki aı merzimge qamaýǵa alyndy, dep habarlaıdy «QazAqparat» HAA tilshisi.
Qaraǵandy oblystyq soty baspasóz qyzmetiniń basshysy Gúlbarshyn Jitikovanyń málimdeýinshe, Qaraǵandynyń Qazybek bı aýdandyq №1 sotynyń tergeýshi sýdıasy kásipkerdi eki aıǵa qamaýǵa alý úkimin shyǵardy.
«Kúdiktiniń kináli nemese kinásiz ekendigin sýdıa ázirge teksergen joq. «Qamaýǵa alý» jónindegi bultartpaý sharasy tekseris ádildigi men jábirlenýshilerge qysym kórsetilýiniń aldyn alý maqsatynda taǵaıyndaldy. Bultartpaý sharasynyń merzimi - eki aı», - dedi Gúlbarshyn Jitikova.
Úsh rıeltorlyq agenttiktiń dırektory ІІM-niń qylmystyq atqarý júıesi komıteti departamentiniń tergeý oqshaýlaǵyshyna qamaýǵa alyndy. Kúdikti telefon nomerlerin ashyq derek kózderinen - jyljymaıtyn múlik jaıly mamandandyrylǵan saıttardan jáne gazet betterindegi habarlamalardan alǵandyǵyn aıtyp, alaıaqtyqqa qatysty kinásin moıyndamaı otyr.
Budan ózge, ár klıent turǵyn úı izdeý nátıjesiniń qandaı bolatyndyǵyna qyzmet kórsetýshi jaýapty emes degen kelisimge qol qoıǵan. Qylmystyq is QR QK-niń 190-baby, 2 bóliminde kózdelgen «birneshe ret qaıtalanǵan alaıaqtyq» boıynsha qozǵaldy.
Aıta keteıik, 24 tamyz kúni polıtsııa qyzmetkerleri páterlerge qatysty 40-qa jýyq alaıaqtyq áreketke kúdikti úsh rıeltorlyq agenttiktiń dırektoryn ustaǵan bolatyn. Polıtsııanyń ártúrli bólimshelerine - Ońtústik Shyǵys, ortalyq jáne Kırovskıı 40-tan astam aryz kelip túsken. Barlyq jábirlenýshiler tergeýshige jalǵa páter alamyz dep habarlasqan agenttikterinen jaramsyz telefon nomerlerin alǵandyǵyn málimdegen. Onyń ústine azamattar páterler jaıly jalǵan aqparattardy aqshalaı syıaqyǵa alǵan.
