Sot kámeletke tolmaǵan qyzǵa Astana Mall ortalyǵynan 100 myń teńge óndirip berdi
ASTANA. QazAqparat - Astana qalasy Almaty aýdandyq soty kámeletke tolmaǵan qyzdyń paıdasyna moraldyq zalal úshin Astana Mall Trading ortalyǵynan 100 000 teńge óndirip berdi. Bul týraly qalalyq sottyń baspasóz qyzmetinen habarlandy.
«Astana Mall» Saýda oıyn-saýyq ortalyǵynyń úshinshi qabatynda ornalasqan dárethananyń kire berisinde taqtaısha edenge qulap, onyń ótkir synyǵy kámeletke tolmaǵan qyz balanyń aıaǵyn jaralaǵan. Saýda ortalyǵynyń qyzmetkerleri jaraqat alǵan balany qalalyq aýrýhanaǵa jetkizip, oǵan medıtsınalyq járdem kórsetilgen. Osyǵan baılanysty taqtaısha plıtkanyń qulaýy men balanyń odan jaraqat alý faktisin jaýapkerler sot otyrysynda da rastady. Al otyrysqa kámeletke tolmaǵan balanyń ókili retinde onyń anasy qatysqan bolatyn», - delingen baspasóz baıanynda.
Sotqa deıingi retteý sharalary aıasynda «Astana Mall» Saýda oıyn-saýyq ortalyǵy shaǵymdanýshyǵa 50 000 teńge kóleminde ótemaqy usynǵan eken. Alaıda, taraptar ótemaqy kólemine qatysty kelise almaǵan.
«Osyǵan baılanysty Almaty aýdandyq soty shaǵymdanýshynyń talaptaryn ishinara qanaǵattandyrdy. Sonyń ishinde «Astana Mall Trading» JShS esebinen moraldyq zalaly úshin aqshalaı 100 000 teńge somasynda ótemaqy óndirýge sheshim shyǵaryldy», - delingen baspasóz baıanynda.
