«Sot kabıneti» servısiniń 7 myńnan astam tutynýshysy online-saýalnamaǵa qatysty
ASTANA. QazAqparat - Joǵarǵy Sot bıylǵy 4-sáýirden bastap sot protsesine qatysýshylar men «Sot kabıneti» servısiniń basqa da qoldanýshylary arasynda online-saýalnama júrgizýdi bastaǵanyn budan buryn habarlaǵanbyz.
Saýalnama azamattardyń elimizde júrgizilip otyrǵan reformalar, sondaı-aq «100 naqty qadam» Ult Josparyn iske asyrý aıasyndaǵy qazaqstandyq sottardyń jumys sapasy men qoljetimdiligine qanaǵattanýshylyq deńgeıin anyqtaý maqsatynda júrgizilýde.
Respondent retinde Qazaqstannyń barlyq óńirlerinen sot protsesine tikeleı qatysýshylar: talap qoıýshylar (ótinish berýshiler); jaýapkerler; jaýaptylyqqa tartylatyn tulǵalar; advokattar; prokýrorlar; memlekettik organdardyń ókilderi; atalǵan servıste tirkelgen basqa da adamdar qatysýda.
19-sáýir kúngi jaǵdaı boıynsha saýalnamaǵa 7192 respondent qatysqan.
Saýalnamaǵa qatysýshylardyń sany boıynsha Shyǵys Qazaqstan oblysy (18%), Almaty qalasy (12%) jáne Qaraǵandy oblysy (11%) alǵashqy úshtikke kiredi.
Saýalnamaǵa mártebesi boıynsha talap qoıýshylar (45%), «Sot kabıneti» servısiniń basqa da qoldanýshylary (34%), memlekettik organdardyń ókilderi (7,5%), advokattar (6,3%), jaýapkerler (6%), jaýaptylyqqa tartylatyn tulǵalar (0,7%) jáne prokýrorlar (0,5%) qatysty.
Sáýir aıynyń 4-i men 18-i aralyǵyndaǵy saýalnama nátıjesin taldaý respondentterdiń sottar jumysyna jalpy oń baǵa beretindigin kórsetti.
Saýalnamaǵa qatysýshylar sot keńseleriniń jumysyna, sot protsesine, sýdıalardyń iriktelýi men ádebine, aqparattyq tehnologııalarǵa, sot ǵımarattarynyń jaılylyǵyna, zańnamany ózgertýge qatysty usynystar bergen. Barlyq usynystarǵa «Sot kabıneti» servısinde tıisti jaýaptar beriletin bolady.
Online-saýalnama jalǵasýda, oǵan qatysý úshin azamattar «Sot kabıneti» servısine (https://office.sud.kz/index.xhtml) tirkelýi kerek.
Servıste tirkelý elektrondyq tsıfrlyq qoltańba (ETsQ) arqyly júrgiziledi.
