Sot «Eır Astana» kompanııasyn jaýapqa tartpaq bolǵan monopolııaǵa qarsy organnyń sheshimin qoldady
Aıta keterligi, buǵan deıin QR Ulttyq ekonomıka mınıstrligi elimizdiń monopolııaǵa qarsy organy tergep-tekserý júrgizetin laýazymdy adamdardyń jumysyna kedergi keltirgeni úshin «Eır Astana» AQ-ǵa qatysty ákimshilik quqyq buzýshylyq týraly is qozǵalǵanyn jarııa etken bolatyn. Alaıda, munymen kelispegen kompanııa quzyrly organdarǵa shaǵymdanǵan edi.
Búgin mınıstrlik Astana qalasynyń mamandandyrylǵan aýdanaralyq ákimshilik soty tergep-tekserý júrgizý bastalǵanǵa deıin suratylǵan aqparatty usynbaǵany úshin avıatasymaldaýshyny ákimshilik jaýapqa tartý jónindegi QR Ulttyq ekonomıka mınıstrligi Tabıǵı monopolııalardy retteý jáne básekelestikti qorǵaý komıtetiniń qaýlysyn joıý týraly Eır Astana» AQ talap aryzynan bas tartqandyǵy týraly aqparatty jarııa etti.
«Osy iske qosymsha BAQ-ta taratylǵan aqparatqa túsinikteme beremiz. Tergep-tekserý nysany habarlaǵandaı monopolııaǵa qarsy organ qyzmetkerleri 2016 jylǵy 20 qyrkúıekte jáne 3 qazanda «Eır Astana» AQ ǵımaratyna ótkizilgen. Al avıakompanııaǵa qatysty ákimshilik is aǵymdaǵy jylǵy 7 qazanda qyzmetkerlerdi ótkizbeýge baılanysty qozǵalǵan. Zańnamaǵa sáıkes tergep-tekserý nysany barlyǵy eki aıdy quraıtyn tergep-tekserý júrgizý merziminiń ishinde monopolııaǵa qarsy organnyń laýazymdy adamdaryna úı-jaıǵa ótýge jáne basqa da zańdy is-áreketterdi oryndaýǵa qol jetkizýge múmkindik berýge mindetti», - delingen Ulttyq ekonomıka mınıstrligi aqparatynda.
