Sot erli-zaıypty Hrapýnovtardy jaýap berýge Almatyǵa shaqyrdy
ALMATY. QazAqparat - Almaty qylmystyq ister boıynsha mamandandyrylǵan soty erli-zaıypty Hrapýnovtardy sot aldyndaǵy sońǵy sózin aıtýǵa Almatyǵa shaqyrdy, dep habarlaıdy QazAqparat tilshisi.
Qalalyq sottyń baspasóz qyzmeti habarlaǵandaı, sýdıa QR «QPK 330-babyn (sottalýshylardyń shetelde bolýyna baılanysty otyrysqa kelmeýi), QR QPK 335,384 baptarynyń (sot jaryssóz aıaqtalǵan soń sottalýshylarǵa sońǵy sóz beriledi) eskere otyryp, Vıktor Hrapýnov, Aııar Іlııasov, Leıla Hrapýnovany 2018 jyldyń 2 qazanynda 9:00 shamasynda Almaty qalasy, Qarasaı batyr kóshesi, 85 ǵımaratyn boıynsha ornalasqa sotqa shaqyrdy», - delingen baspasóz habarlamasynda.
Aıta ketý kerek, búgin sotta Hrapýnovtar isi boıynsha jaryssóz ótti.
Memlekettik aıyptaýshy Vıktor Hrapýnovty 20 jylǵa, onyń jary Leıla Hrapýnovany 17 jylǵa, Aııar Іlııasovty 8 jylǵa bas bostandyǵynan aıyrýdy suraǵan bolatyn.
Aıta ketý kerek, erli-zaıypty Hrapýnovtarǵa memleket múlkin tonady, alaıaqtyq jasady, qyzmettik laýazymyn asyra paıdalandy, para alyp, uıymdasqan qylmystyq top qurdy degen aıyp taǵylǵan.
Olardyń memleketke keltirgen shyǵyny 250 mln dollardy qurap otyr.
