Sot emes, sotsymaqqa aınalyp barady: Bıshimbaevtyń advokaty sýdıamen daýlasyp qaldy
ASTANA. KAZINFORM — Astana qalasynyń qylmystyq ister jónindegi mamandandyrylǵan aýdanaralyq sotynda eks-mınıstr Qýandyq Bıshimbaevqa qatysty sot otyrysy taraptardyń daý-damaıyna ulasty. Osy rette sýdıa Aıjan Qulbaeva sot protsesin ýaqytsha toqtatý jóninde sheshim qabyldady.
— Men sizdiń áreketterińizge taǵy da qarsylyq bildirýge májbúrmin. Siz sottalýshynyń sóıleýine, suraq qoıýyna múmkindik bermeısiz. Bul birjaqty protsess sııaqty. Sot emes, sotsymaqqa aınalyp barady. Barlyǵy Bıshimbaevqa qarsy, — dedi Erlan Ǵazymjanov sotta.
Sýdıa advokattyń sot otyrysy barysynda birneshe ret eskertý alyp, sotqa qurmetsizdik tanytýyna baılanysty jeke sot qaýlysy shyǵarylatynyn málimdedi.
Sýdıa Aıjan Qulbaeva keńesý bólmesinen shyqqannan keıin tómendegideı málimdeme jasady.
«Atalǵan qylmystyq is boıynsha kásibı mindetterin atqarý kezinde advokat Ǵazymjanovqa qatysty jeke qaýly shyǵaryldy. Qaýly Astana qalasy advokattar alqasynyń tóralqasyna joldansyn. Respýblıkalyq advokattar alqasy qaraý nátıjeleri men qabyldanǵan sharalar týraly bir aı merzimnen keshiktirmeı jeke sheshim shyǵarǵan sotqa habarlasyn», - dedi sýdıa.
Sondaı-aq, sýdıa aldaǵy ýaqytta mundaı jaǵdaılardy boldyrmaý úshin protseske qatysýshylar qylmystyq is júrgizý kodeksiniń normalaryn múltiksiz oryndaýǵa, emotsııalaryn retteýge jáne tóraǵalyq etýshiniń buıryǵyna baǵynýǵa tıis ekenin jetkizdi.
