Kolorado soty Donald Trampqa saılaýǵa túsýge tyıym saldy
Amerıkanyń Kolorado shtatynyń Joǵarǵy soty burynǵy prezıdent Donald Trampty 2024 jyly AQSh-ta ótetin prezıdent saılaýyna úmitkerler tiziminen shyǵarý sheshimin qabyldady. Bul 2021 jyldyń 6 qańtaryndaǵy oqıǵaǵa D.Tramptyń róline qatysty bolyp otyr. Ol kezde eks-prezıdenttiń jaqtastary Djo Baıdenniń jeńiske jetýine qarsylyq bildirip, Kapıtolııge basyp kirgen edi. Kazinform bul týraly VVS-ge silteme jasap habarlaıdy.
Sot 4:3 daýyspen sheshim shyǵaryp, Respýblıkalyq partııadan úmitker D.Trampqa «AQSh úkimetine qarsy zorlyq-zombylyqqa arańdatýdaǵy» róline baılanysty Konstıtýtsııa oǵan 2024 jylǵy saılaýǵa túsýge tyıym salady dep uıǵardy.
Sot sheshimi Koloradoda 5 naýryzda ótetin Respýblıkalyq partııanyń praımerızine ǵana qatysty. Alaıda, bul sheshim Tramptyń 5 qarashadaǵy jalpy saılaýdaǵy statýsyna áser etýi múmkin.
Sheshimniń kúshine enýi apellıatsııa berilgenge deıin keıinge qaldyryldy.
Buǵan deıin habarlaǵanymyzdaı, Nıý-Iork sýdıasy Donald Tramp pen onyń uldaryn alaıaqtyq boıynsha kináli dep tanydy. Tramptar 10 jylǵa jýyq ýaqyt jalǵan qarjylyq esepter berip kelgen. Otbasylyq – Trump Organization kompanııasynyń bıznes sertıfıkaty toqtatylady. Al onyń 2020 jylǵy prezıdent saılaýy nátıjesin joıýǵa talpynýyna qatysty is 2024 jyldyń 4 naýryzda qaıta qaralatyn boldy.
Aıta keteıik, 77 jastaǵy Donald Tramp kelesi jyly prezıdent saılaýyna qatysýǵa nıetti jáne Respýblıka partııasynyń kandıdaty bolýǵa úmitkerler arasynda kósh bastap tur.
Amerıkada prezıdent saılaýy 2024 jyldyń 5 qarashasynda ótedi.
