Sot daıashyǵa til tıgizdi dep aıyptalǵan memqyzmetshige qatysty isti toqtatty

AQTAÝ. QazAqparat - Aqtaý qalasynyń ákimshilik ister jónindegi mamandandyrylǵan sotynda «daıashyǵa til tıgizdi» dep aıyptalǵan memlekettik qyzmetshige qatysty ákimshilik is toqtatyldy, dep habarlaıdy QazAqparat tilshisi oblystyq sottyń baspasóz qyzmetine silteme jasap.

Aqtaý qalasynyń ákimdiginde qyzmet etetin mamanǵa qatysty QR Ákimshilik quqyqbuzýshylyq týraly kodekstiń 434-babynyń 1-bóligi boıynsha túsken ákimshilik is qujaty qaralyp, onda quqyqbuzýshylyqtyń bolmaýyna baılanysty óndiristen qysqartylǵan.

Aıta keteıik, 22 qyrkúıek kúni áleýmettik jelide memlekettik qyzmetshige qatysty vıdoe jarııalanyp, ol qalyń kópshilik arasynda qyzý talqysyna túsken edi. Beınetaspa ıesi qaladaǵy dámhananyń birinde bolǵan E.Ánesovtiń «daıashyǵa tólem chegin memlekettik tilde surap, daıashydan da memlekettik tilde jaýap berýin talap etkenin, til tıgizgenin» jazǵan bolatyn. Alaıda, onda naqty qandaı sózder aıtqany kórsetilmegen.

QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Mańǵystaý oblysy boıynsha departamenti E.Ánesovke qatysty Ádep kodeksiniń 7-tarmaǵy 3-tarmaqshasyn, 5-tarmaǵy 2-tarmaqshasy boıynsha Aqtaý qalasy ákiminiń atyna usynys engizgen edi.

Al Aqtaý qalasy ákiminiń baspasóz qyzmeti qyzmettik tekseristiń taǵaıyndalǵanyn habarlaǵan bolatyn.

«Sot vıdeotúsirilimderdi qaraý barysynda E.Ánesovtiń aınalasyndaǵylarǵa ádepsizdik tanytyp, basqanyń ar-namysyna tıetin sózder aıtqany anyqtalǵan joq», - delingen habarlamada.