Sot burynǵy vıtse-mınıstr S. Shaıahmetovtiń uıqamaqta ustaý jaǵdaıyn jeńildetý týraly ótinishin qoldamady
ASTANA. QazAqparat - Astana qalasy №2 Almaty aýdandyq soty eks-vıtse-mınıstr Saıat Shaıahmetovti úıqamaqta ustaý jaǵdaıyn jeńildetý týraly advokattyń ótinishin qoldamady. Eske salaıyq, sybaılas jemqorlyq boıynsha aıyptalǵan eks-vıtse-mınıstr Saıat Shaıahmetovtiń isine qatysty alǵashqy sot otyrysy sýdıa Baqytbek Syzdyqovtyń tóraǵalyǵymen ótýde.
Sot otyrysy barysynda burynǵy vıtse-mınıstri Saıat Shaıahmetovtiń qorǵaýshysy Nurlan Beısekeev aıyptalýshyny úıqamaqta ustaý jaǵdaıyn jeńildetýdi suraǵan bolatyn. Bul rette advokat sottan aıyptalýshyǵa keshki saǵat 20.00-den bastap tańǵy 8-ge deıin úıqamaqta bolý týraly shekteýdi taǵaıyndaý jóninde ótinish jasaǵan. Onyń aıtýynsha, aıyptalýshynyń áıeli júkti ári naýqas, sondyqtan da medıtsınalyq mekemelerge qaralý barysynda oǵan kómek qajet. «S.Shaıahmetovtiń áıeline qaraılasyp qana qoımaı, balalarynyń tárbıesimen aınalysýǵa jaǵdaı jasalsa», - dedi ol.
Alaıda bundaı ótinishti sýdıa B. Syzdyqov qoldamady.
Esterińizge sala keteıik, búgin Astanada №2 Almaty aýdandyq sotynda burynǵy QR Bilim jáne ǵylym vıtse-mınıstri Saıat Shahmetovke qatysty sot otyrysy ótip jatyr. Sotta aıyptalýshylar qatarynda «Qazaqstan Respýblıkasynyń salynyp jatqan bilim jáne ǵylym nysandary dırektsııasy» JShS bas dırektory Aleksandr Pak pen «ZAK Servıs» JShS burynǵy bas dırektory Roman Kıreev, sondaı-aq, atalǵan JShS qazirgi dırektory Alekseı Týtýbalın bar. Al aıyptaý qorytyndysyna keler bolsaq, atalǵan tulǵalarǵa qazynanyń 1,15 mlrd teńge qarjysyn jymqyrdy delinedi.
«Kıreev, óziniń qyzmettik laýazymyn paıdala otyryp, Shaıahmetovpen, Pakpen, Týtýbalın jáne basqa da belgisiz tulǵalarmen aldyn-ala sóz baılasý arqyly1 mıllıard 154 mıllıon 618 myń 819 teńge kóleminde bıýdjet qarjysyn jymqyryp, ózara bóliske salǵan. Olar 2010 jyldyń jeltoqsanynan bastap 2012 jyldyń jeltoqsanyna deıin jalǵan kásipkerlik shoty arqyly aqshalaı qarjynyń jartysyn urlaǵan. Soǵan oraı, Saıat Shaıahmetov, memlekettik mindetterdi oryndaýǵa ýákiletti tulǵa bola tura, Alekseı Pak memlekettik mindetterin oryndaıtyn tulǵaǵa teńestirilgen laýazym ıesi bola tura, Alekseı Kıreev, Alekseı Týtýbalın bıýdjetke shyǵyn keltirip, senip tapsyrylǵan múlikti jymqyrǵan», - dedi sot otyrysynda aıyptaý qorytyndysyn oqyǵan prokýror Sáýle Sydyqova.
