Sot BTA-bankten aqsha urlaǵan Potkın isi boıynsha Navalnyıdy jaýapqa alady
ASTANA. QazAqparat - Máskeýdiń Meşanskıı soty 14 shildede oppozıtsıoner Alekseı Navalnyıdy qazaqstandyq BTA-bankinen aqsha urlady dep aıyptalǵan ultshyl Aleksandr Belov (Potkın) isi boıynsha jaýapqa alady.
«Erteń sotta Navalnyıdy kýáger retinde jaýapqa alý kútilýde», - dedi RIA Novostı agenttigine Potkın advokaty Ivan Mıronov. Navalnyı qorǵaý tarapynyń kýágeri retinde shaqyrtyldy. Advokattyń sózine qaraǵanda, odan qazaq oppozıtsııasymen árekettestigi týraly suralady.
Mıronov túsindirgendeı, Navalnyı aqsha urlaý isi boıynsha emes, Potkınge ekstremızm boıynsha taǵylǵan aıyp boıynsha jaýapqa alynady. «Aıyptaý nusqasy boıynsha, Potkın ekstremıstik qoǵamdastyq qurǵan. Onyń maqsaty orystar men qazaqtar arasynda ultaralyq qaqtyǵysty týdyrý», - dep atap ótti advokat. Onyń sózine qaraǵanda, tergeý ol qurǵan qoǵamdastyqty Qazaqstandaǵy, keıin Reseıdegi buqaralyq tártipsizdikke daıyndyq dep sanaıdy.
Eske sala keteıik, Potkın 2014 jyly 15 qazanda máskeýlik "Intýrıst Kolomenskoe" qonaq úıinde BTA-banki salymshylarynan 5 mıllıard dollar urlaý isi boıynsha ustalǵan bolatyn.
Tergeý pikirinshe, 2012 jyldan 2014 jylǵa deıin ol bir top tulǵamen «qylmystyq jolmen alynǵan múlikti zańdastyrýǵa baǵyttalǵan birqatar is-áreket kestesin quryp, júzege asyrdy». Sonymen qatar, oǵan qatysty ekstremızm isi boıynsha qylmystyq is qozǵaldy. Osyǵan baılanysty sot Potkındi úı qamaǵynan tergeý ızolıatoryna jóneltti.
