Sot boıjetkendi qaǵyp óltirgen avtobýs júrgizýshisine úkim shyǵardy
ALMATY. QazAqparat - Almatyda boıjetkendi qaǵyp óltirgen avtobýs júrgizýshisi 1 jyl 6 aıǵa sottaldy, dep habarlaıdy QazAqparat tilshisi sot zalynan.
Úkimdi Áýezov aýdandyq sotynyń sýdıasy shyǵardy.
«Ánýar Jánibekov QR QK 345-babynyń, 3-bóligimen aıypty dep tanylyp, 1 jyl 6 aıǵa bas bostandyǵynan aıyrylsyn. Sondaı-aq, 4 jylǵa kólik aıdaý quqyǵynan aıyrýdy úkim etemin», - dedi sýdıa.
Sýdıa sottalýshyǵa nelikten osyndaı úkim shyǵarylǵanyn túsindirdi.
«Sizder japa shekken tarappen kelisimge kelseńizder, jazadan qutylamyn dep oılamańyzdar. Bul barlyq avtobýs júrgizýshilerine sabaq bolýy tıis. Avtobýs júrgizýshileri jıi jol erejesin buzyp, báıge uıymdastyrady. Sol árekettińiz úshin siz jaýap berýińiz kerek», - dedi sýdıa.
Aıta keteıik, jol apaty bıyl 18 sáýir kúni Saıran vokzalynyń mańynda bolǵan edi. 24 jastaǵy boıjetkendi №126 avtobýs júrgizýshisi týra qıylysta qaǵyp ketken. Soqqydan qyz birer metr jerge ushyp túsip, alǵan jaraqatynan sol jerde kóz jumdy. Jol apaty kóshedegi beınekameralarǵa túsip qalǵan.
