Sot Boeing kompanııasyn áýe apatynyń qurbandaryna $28 mln tóleýge májbúrledi

ASTANA. KAZINFORM – Chıkagonyń federaldy sotyndaǵy alqabıler Boeing kompanııasy 2019 jyly Efıopııada apatqa ushyraǵan 737 MAX ushaǵynda mert bolǵan BUU-nyń qorshaǵan ortany qorǵaý boıynsha qyzmetshisine 28 mln dollar tóleýi qajet degen sheshim shyǵardy.

Reuters agenttiginiń habarlaýynsha, Shıkhı Gargtyń otbasyna qatysty qabyldanǵan sheshim áýe apatynan keıin jáne 2018 jyly Indonezııada bolǵan apattan keıin túsirilgen ondaǵan shaǵymdar boıynsha dáleldengen alǵashqy is bolyp otyr. Atalǵan apattardyń saldarynan jalpy sany 346 adam kóz jumǵan.

Taraptardyń ekijaqty kelisimi boıynsha Shıkhı Garg sot sheshimi negizinde berilgen 35,85 mln dollardy tolyqtaı jáne oǵan qosymsha osy somanyń 26 paıyzyn alady. Boeing appelıatsııaǵa bermeıtin boldy, dedi otbasynyń advokattary.

Óz málimdemesinde Boeing ókili osy eki apattan jaqyndary qaza bolǵan azamattardyń barlyǵyna kóńil aıtty.

- Biz osy sııaqty ózge de birqatar shaǵymdy rettedik, soǵan qaramastan otbasy músheleriniń sot arqyly ádildikke qol jetkizýge quqyqtary bar jáne biz olardyń quqyqtaryna qurmetpen qaraımyz, - dedi ol.

Shaǵymda 737 MAX ushaǵynyń aqaýlary bolǵany aıtylǵan. Al Boeing kompanııasy bul týraly jolaýshylarǵa habarlamaǵan.

Ethiopian Airlines ushaǵynyń apaty Lion Air 610 ushaǵy Indonezııada apatqa ushyraǵan soń 5 aıdan keıin boldy. Eki jaǵdaıda da apatqa ushaqtyń avtomatty basqarý júıesiniń aqaýy sebep bolǵan.

- 5 qarashada Boeing Ethiopian Airlines kompanııasy ushaǵynyń qurbandaryna qatysty taǵy úsh shaǵym boıynsha máseleni sheshken bolatyn, - dedi zardap shekkenderdiń advokaty.

Ol kezde Boeing ókilderi 737 serııasyndaǵy avıalaınerlerdi 2020 jyldyń qańtarynan bastap shyǵarýdy toqtatatynyn málimdegen.

Aıta keteıik, 2018 jyly 29 qazanda Indonezııanyń Lion Air áýe kompanııasynyń jolaýshylar ushaǵy apatqa ushyrady. Djakartadan Pankalpınangqa bet alǵan ushaq teńizge qulap, 189 adam mert boldy.