Sot bloger Mahambet Abjandy 2 aı kúzetpen ustaý sharasyn sanktsııalady
NUR-SULTAN. QazAqparat – Іri kólemde aqsha bopsalaý kúdigine ilingen bloger Mahambet Abjan 2 aıǵa qamaýǵa alyndy, dep habarlaıdy QazAqparat tilshisi Nur-Sultan qalalyq sotynyń baspasóz qyzmetine silteme jasap.
«5 shildede Nur-Sultan qalasynyń mamandandyrylǵan aýdanaralyq tergeý soty kúdikti M. Abjandy 2 aı merzimge kúzetpen ustaý túrindegi bultartpaý sharasyn sanktsııalady», - dep jazdy qalalyq sottyń baspasóz hatshysy Botagóz Baıanova Facebook paraqshasynda.
Eske salsaq, 3 shilde kúni Mahambet Abjan kásipkerden 50 mln teńge bopsalady degen kúdikpen ýaqytsha ustaý ızolıatoryna otyrǵyzylǵan edi.
«Sybaılas jemqorlyqqa qarsy qyzmet BAQ-ta nuqsan keltiretin málimetter taratý qaýpimen kásipkerden asa iri kólemde aqsha qarajatyn bopsalaǵan azamat M. Abjannyń qylmystyq áreketiniń jolyn kesti. 3 shildede júrgizgen arnaıy operatsııanyń nátıjesinde azamat M. Abjan 50 mln teńge alǵannan keıin ustalyp, Nur-Cultan qalasynyń ýaqytsha ustaý ortalyǵyna qamaýǵa alyndy. M. Abjannyń basqa da uqsas qylmystarǵa qatystylyǵy týraly aqparat tekserilip jatyr», - dep málimdegen bolatyn Antıkor.
