Sot bloger Álibekovtiń kóligimen jas jigitti basyp ketken júrgizýshige úkim shyǵardy

QONAEV. KAZINFORM – Almaty oblysy Іle aýdandyq sotynda P.-ǵa qatysty QR Qylmystyq kodeksiniń 104-babynyń 1-bóligi boıynsha (abaısyzda adam ólimine ákep soqqan is-áreket) qylmystyq is qaraldy.

2024 jyldyń 29 qazan kúni Aqsaı aýylyndaǵy «Sokol» avtodromynyń aýmaǵynda beınerolık úshin trıýk oryndaý kezinde 22 jastaǵy jas jigit 45 jastaǵy júrgizýshi basqarǵan kóliktiń astyna túsken. Lamborghini kóligi bloger Beıbit Álibekovke tıesili bolǵan.

Almaty oblysy Іle aýdandyq sotynyń málimetinshe, prokýror kólikti basqarǵan P.-ǵa bostandyǵyn shekteý túrindegi jaza taǵaıyndaýdy surady. Al aıyptalýshy P. óz kinásin tolyq moıyndady, alaıda jábirlenýshilerdiń árqaısysyna 100 mln teńge kóleminde moraldyq zııandy óteý týraly azamattyq talappen kelispeıtinin bildirdi.

Jábirlenýshiler A. jáne A. bul qylmysty qasaqana jasalǵan dep sanap, isti QR QK-niń 106-babyna qaıta saralaýdy suraǵan.

- Sot P.-ny QR QK-niń 104-babynyń 1-bóligi boıynsha kináli dep tanyp, oǵan 1 jyl 6 aı merzimge bostandyǵyn shekteý jazasyn taǵaıyndady. Sot jazany taǵaıyndaý kezinde jazany jeńildetetin mán-jaılar retinde — aıyptalýshynyń kámeletke tolmaǵan múgedek balasynyń bar ekenin, shyn júrekten ókinýin eskerdi, - dep habarlady Іle aýdandyq soty.

Sondaı-aq sot moraldyq zııandy óndirý týraly sheshim shyǵardy:

* Jábirlenýshi A.-nyń paıdasyna — 3 000 000 teńge;

* Jábirlenýshi A.-nyń paıdasyna — 2 000 000 teńge.

Úkim zańdy kúshine engen joq.

Eske salaıyq, buǵan deıin Almaty oblysynda jedel járdem kóligi qaǵyp ketken azamat qaıtys bolǵanyn jazǵanbyz.