Sot bıligi men aqparat quraldary ókilderiniń qarym-qatynasyn retteıtin naqty qatynas ustanymdary qajet - Astana qalalyq sotynyń tóraǵasy
ASTANA. 28 qazan. QazAqparat /Aıdar Ospanalıev/ -«Sot qyzmetindegi ádildik búgingi qoǵamda eń ózekti degen máselelerdiń biri. Osyǵan qaraı biz de sot júıesiniń ashyq, jarııaly bolýyna kúsh salyp otyrmyz.
Osy rette Astana qalasynyń sottary qoǵam ókilderimen pikir talastyrýǵa, olarmen qoıan-qoltyq jumys isteýge daıyn», - deıdi Astana qalalyq sotynyń tóraǵasy Sáken Abdýllaev. Bul týraly ol búgin Astana qalalyq sotynyń ǵımaratynda ótip jatqan «Sot bıligi jáne buqaralyq aqparat quraldary» atty aımaqtyq semınar barysynda aıtty.
Qalalyq sot tóraǵasynyń málimdeýinshe, qoǵamdy elde bolyp jatqan úderisterden aqparattandyryp otyrý quqyqtyq, demokratııalyq qoǵamǵa tán qubylys. «Jalpy alǵanda búginde jýrnalısterge aqparatty buqaralyq negizde taratatyn qural retinde qoǵamǵa aqparatty naqty dál kórsetý baǵytynda úlken jaýapkershilik júktelip otyr. Sondyqtan elde sot bıligi men aqparat quraldary ókilderiniń qarym-qatynasyn retteıtin naqty qatynas ustanymdary qajet. Osy oraıda Astana qalalyq soty ádil sot bıliginiń ashyqtyǵyn qamtamasyz etýde birqatar mańyzdy sharalardy júzege asyryp jatqandyǵyn aıta kerý kerek. Bul rette azamattar men jýrnalıster qaýymynyń sotqa degen senimin nyǵaıtý sot qyzmetiniń basym baǵyttary bolyp otyr», -deıdi S.Abdýllaev.
Onyń sózinshe, elimizdiń Azamattyq protsessýaldyq kodeksiniń 150-shi baby men «Aqparattandyrý týraly» zańynda kórsetilgen mindetterdi oryndaý maqsatynda mamandandyrylǵan aýdanaralyq soty «Elektrondy úkimet» portaly arqyly bıylǵy jyldyń qazan aıynan bastap, elektrondy túrde berilgen ótinish-aryzdar qaraýda. «Sonymen qatar elimizde alǵash ret beınekkonferentsııalyq baılanys negizinde Astana qalalyq sotynda elimizdiń ár aımaqtarynda turatyn 170-ten astam kýágerlerdiń qatysýymen sot protsesi ótti. Búgingi forým da qoǵam ókilderiniń quqyqtyq saýatyn arttyrýǵa baǵyttalǵan mańyzdy sharalardyń biri bolady degen úmittemin», - dedi qalalyq sot tóraǵasy.
