Sot bıligi búginde ózin azamattardyń quqyqtary men bostandyqtaryn qorǵaı alatyn turaqtandyrýshy kúsh retinde kórsetip otyr - M.Álimbekov
ASTANA. Jeltoqsannyń 7-si. QazAqparat /Aıdar Ospanalıev/ - Qazaqstannyń sot bıligi búginde ózin azamattardyń quqyqtarymen bostandyqtaryn qorǵaı alatyn jáne qoǵamdyq áleýmettik qaqtyǵystardan saqtandyra alatyn turaqtandyrýshy kúsh retinde kórsetip otyr.
Al elimizdiń sot-quqyqtyq júıesin jetildirýdiń bolashaǵy sottar men sýdıalardyń biliktiligin arttyrý jáne arazdasýshy taraptardy ózara tatýlastyrý, ıaǵnı medıatsııa sharalaryn engizýmen baılanysty. Bul týraly búgin Berlınde ótip jatqan «Qazaqstan Respýblıkasynyń 2010-2020 jyldarǵa arnalǵan quqyqtyq saıasat tujyrymdamasy: quqyqtyq jáne sot reformasy salasyndaǵy turaqty damý» atty taqyryptaǵy halyqaralyq konferentsııasy barysynda Joǵarǵy sot tóraǵasy Musabek Álimbekov málim etti, dep habarlaıdy QazAqparat.
Joǵarǵy sot tóraǵasy óziniń sózinde ákimshilik sot qyzmetine erekshe toqtaldy. Onyń aıtýynsha, elimizde óz aldyna jeke ákimshilik-protsessýaldy kodeks qabyldaıtyn ýaqyt jetti. Al jańa zańnama jańa úlgidegi ákimshilik sottardyń qalyptasýyna yqpal etýi tıis jáne olar azamattardyń quqyqtary men uıym, mekemelerdiń múddelerin tıimdi qorǵaı bilýi tıis.
Sondaı-aq M.Álimbekov elimizdiń azamattyq-protsessýaldyq zańnamalaryn ózgertý qajettigin atap kórsetti. Onyń aıtýynsha, búginde respýblıka sýdıalary ózderiniń quzyryna jatpaıtyn jumystarmen aınalysyp keledi jáne bul jumystar olardyń 66 paıyz jumys ýaqytyn alady. Zańdardy jetildirý olardyń qyzmetin birshama ońtaılandyrýǵa septigin tıgizedi. «Sondaı-aq eldegi zańdardyń quqyq buzýǵa jol ashatyn ketikterine tosqaýyl qoıylý kerek. Korporatıvti máselelerge qatysty jáne jalǵan kásipkerlikti retteıtin zańnamalar da jetildirýdi qajet etedi. Sonymen qatar qylmystyq protsessýaldyq kodekske qatysty da jańa kózqaras qalyptastyryp, qorǵaýshynyń qylmystyq sot óndirisine qatysyp, aıyptalýshynyń quqyqtarynyń qorǵalý deńgeıin arttyryp, sot óndirisin barynsha kásibılendirýge kúsh salý qajet», dedi M.Álimbekov.
