Sot Bek Air áýe kompanııasynyń múlkine shekteý qoıdy
ALMATY. KAZINFORM – Almatyda 2019 jyly bolǵan Bek Air ushaǵynyń apatyna qatysty qylmystyq is boıynsha kezekti sot otyrysy ótti.
Túrksib aýdandyq sotyndaǵy aıyptalýshylar oryndyǵy bos tur. Sebebi is boıynsha aıyptalýshylar retinde kórsetilgen ushqyshtar - Meıirjan Moldaqulov pen Marat Muratbaev apat kezinde qaza tapqan.
Búgin sot otyrysynda prokýror jábirlenýshilerdiń azamattyq talaptaryn qamtamasyz etý maqsatynda «Bek Air» áýe kompanııasynyń jáne onyń basshysy Nurlan Jumasultanovtyń múlkine shekteý qoıý týraly ótinish bildirdi.
Tóraǵalyq etýshi sýdıa Dastan Almaǵambetov bul ótinishti ishinara qanaǵattandyrdy.
- Jumasultanovtyń múlkine tyıym salý týraly ótinish qanaǵattandyrylmaıdy. Al «Bek Air» AQ múlkine shekteý qoıylady, sebebi azamattyq talap qoıylǵan jaǵdaıda sot onyń oryndalýyn qamtamasyz etýge mindetti. Jábirlenýshilerdiń «Bek Air» kompanııasyna azamattyq talaby bar. Іs materıaldarynda áýe kemesine qoıylǵan shekteý bar, biraq talap somasy ushaqtardyń qunynan áldeqaıda joǵary. Ár ushaqtyń quny 46 mln teńge dep baǵalanǵan, al talap somasy shamamen 4 mlrd teńge, – dep túsindirdi sýdıa.
Osyǵan baılanysty sot «Bek Air» kompanııasynyń 7 áýe kemesine, qozǵaltqyshtaryna jáne 4 konteınerine shekteý qoıý týraly sheshim qabyldady.
Buǵan deıin sotta Bek Air ushaq apatynyń sebebin dálirek anyqtaý úshin jasandy ıntellekt saraptamasyn paıdalaný usynyldy.
Sondaı-aq sot-medıtsınalyq sarapshy áýe kemesiniń apaty boıynsha óz qorytyndysyn jarııalady.
Eske salaıyq, 2019 jyldyń 27 jeltoqsanynda Almatydan Astana qalasyna ushyp shyqqan «Bek Air» kompanııasynyń ushaǵy radardan joǵalyp ketti.
Keıin 95 jolaýshysy jáne 5 ekıpaj múshesi bar ushaqtyń apatqa ushyraǵany málim boldy.
Ushaq jerge qulaǵan soń syrǵanap baryp áýejaı aýmaǵyna jaqyn tustaǵy aýyl shetindegi eki qabatty úıge soǵylǵan. Saldarynan 12 adam qaza tapty. Osydan keıin «Bek Air» áýe kompanııasyna tıesili toǵyz Fokker-100 ushaǵynyń qyzmeti toqtatyldy.
2021 jyly Almaty oblysynyń Talǵar aýdandyq soty áýejaı mańyndaǵy jer ýchaskelerin zańsyz satqan burynǵy sheneýnikter men rıeltorǵa qatysty úkim shyǵardy.