Sot Aıan Meıirbaev pen Erasyl Áýbákirovtiń vıdeosyna qatysty túsinikteme berdi
ASTANA. QazAqparat - Medıtsına ýnıversıtetiniń stýdenti Erasyl Áýbákirovtiń ólimine qatysty qylmystyq isti qaraý barysynda qylmystyq-protsessýaldyq zańbuzýshylyqtar tirkeldi, dep habarlaıdy QazAqparat.
«Sot tıisti sharalardy qabyldaý maqsatynda azamattardyń jeke ómirine baılanysty jeke aqparattardy taratýǵa jáne qoldanýǵa qatysty qylmystyq-protsessýaldyq zańnamany buzý týraly málimetterdi QR ІІM men Astana prokýratýrasyna jetkizýdi qaýly etedi. Sotqa onyń nátıjelerin habarlaý úshin bir aı beriledi», - dedi Astana qalalyq qylmystyq ister boıynsha mamandandyrylǵan aýdanaralyq sotynyń sýdıasy Ashat Áshirbekov.
Onyń aıtýynsha, sot otyrysy barysynda zardap shegýshi Aıan Meıirbaev sotqa aryz túsirgen. Onda ol Nurbek Ájimbaıdyń ákesi 23 qyrkúıek kúni Abiev.kz saıtyna qaralyp jatqan qylmystyq is materıaldaryn, atap aıtqanda beınerolıkti taratyp jibergen.
«Bul beınerolık tergeý tobymen is materıaldaryna engizilgen jáne qoǵam ıgiligine aınalmaýy tıis bolǵan», - dep atap ótti ol.
Sýdıanyń aıtýyna qaraǵanda, Іzmuhanov (Nurbek Ájimbaıdyń ákesi) qylmystyq is materıaldardy jáne beınematerıaldardy alýǵa múmkindigi bolmaǵan.
«Іzmuhanov Abiev.kz tilshisine bergen suhbatynda is materıaldary onyń qolynda baryn jáne eger aıyptaý úkimi shyqqan jaǵdaıda onymen qoldanylatynyn aıtqan. Osylaısha, Іzmuhanovtyń tarapynan bopsalaý jáne sot júıesine qysym jasaý oryn alýda», - dedi sýdıa.
A.Áshirbekovtiń atap kórsetkenindeı, qylmystyq is materıaldaryn taratpaý týraly eskertý bir emes, birneshe márte aıtylǵanyna qaramastan, Nurbek Ájimbaı qorǵaýshylary tarapynan qoǵamdyq pikirge jáne sotta alqabıler múshelerine áser etý maqsatynda istiń mán-jaıy men faktilerin burmalaıtyn aqparattardy taratýyn doǵarǵan joq.
«Osylaısha, ádil sot tóreligin júrgizýge kedergi keltirý úshin sot qyzmetine aralasý oryn alyp jatyr. Atalmysh kúmándi aqparattar qoǵam arasynda quqyq qorǵaý organdaryna, sot júıesine degen senimge nuqsan keltirýde. Osyny negizge ala otyryp, (Meıirbaev - avtor eskertpesi) atalmysh fakti boıynsha tekseristi júrgizýdi jáne ony ІІM-niń tergeý organdaryna joldaýdy suraýda», - dedi A.Áshirbekov.
Sýdıa Meıirbaevtyń ótinishi qanaǵattandyrylatynyn aıtty.
«Sot keńes bólmesinde jeke qaýly shyǵardy, qaýlyda memlekettik organdar men quzyrly tulǵalardyń, uıymdardyń jáne olardyń basshylaryn osy is boıynsha zańdy buzý áreketterine jáne jekelegen tulǵalardyń burys qylyqtaryna nazaryn aýdarady», - dedi ol.
Eske sala keteıik, Astana medıtsına ýnıversıtetiniń stýdenti Erasyl Áýbákirov aqpan aıynda aıaýsyz óltirilgen bolatyn. 10 aqpanda Astana qalalyq ІІD-niń qyzmetkerleri jedel-izdestirý sharalary barysynda E.Áýbákirovtiń máıitin qar astynan taýyp aldy. Adam óltirdi degen kúdikpen basynda tórt adam - Aıan Meıirbaev, Andreı Tıhonenko, Vıtalıı Sherstenev jáne Nurbek Ájimbaı ustalǵan edi. A.Meıirbaev qylmystyq iste eń basty kúdiktilerdiń biri bolǵan. Biraq keıin Aıan Meıirbaevqa qatysty qylmystyq qýdalaý toqtatyldy, 7 mamyrda Astana prokýrorynyń kelisimimen Aıan Meıirbaev bosatyldy.
Al búgin, 12 qazan kúni Astana qalasy qylmystyq ister boıynsha mamandandyrylǵan aýdanaralyq sotynyń sýdıasy Asxat Áshirbekov medıtsınalyq ýnıversıtettiń stýdenti Erasyl Áýbákirovtiń isi boıynsha sot úkimin shyǵardy.
Sot barysynda qylmys jasady degen kúdikpen jaýapqa tartylǵan Nurbek Ájimbaı, Vıtalıı Sherstenev pen Andreı Tıhonenkolarǵa 11-den 20 jylǵa deıin bas bostandyǵynan aıyrý jazasy kesildi.
