Sot Aıagózdegi balalardyń ólimine úsh medıtsına qyzmetkerin kináli dep tanydy
AıAGÓZ. QazAqparat – Shyǵys Qazaqstan oblysynyń Aıagóz qalasyndaǵy arnaıy áleýmettik kómek ortalyǵyndaǵy tórt balanyń ólimine qatysty sot úkimi shyqty.
Sot sheshimi boıynsha balalardyń ólimine úsh medıtsına qyzmetkeri kináli dep tanyldy, dep habarlaıdy QazAqparat tilshisi Aıagóz aýdandyq sotynyń baspasóz qyzmetine silteme jasap.
Sottyń baspasóz qyzmeti «medıtsına qyzmetkerlerine mindettemelerin oryndamaǵan, osynyń saldarynan balalar kóz jumǵan» degen aıyp taǵylǵanyn habarlaıdy. Іs sotqa protsessýaldyq kelisimmen jetken. Prokýror men sottalýshylar jábirlenýshiniń kelisimimen (balalar ortalyǵy) protsessýaldyq kelisimge kelgen.
Kelisimdi negizge ala otyryp, prokýror medıtsına qyzmetkerleriniń ekeýiniń 2 jylǵa bas bostandyǵyn shekteýdi, olarǵa 1 jyl boıy medıtsınalyq jumysty atqarýǵa tyıym salýdy, al úshinshi qyzmetkerdiń 3 jyl 6 aıǵa bas bostandyǵyn shekteýdi, oǵan 1 jyl 6 aı boıy medıtsınalyq jumysty atqarýǵa tyıym salýdy suraǵan. Sotta taraptardyń bári de, onyń ishinde jábirlenýshi tarap ta osy kelisimdi maquldaıtynyn jetkizdi.
Sotta atalyp ótkendeı, QR Qylmystyq kodekstiń 317-baby 3-bóligi aýyr qylmys sanatyna jatpaıdy. Al 317-baptyń 4-bóligi aýyrlyǵy ortasha qylmys sanatyna jatady. Prokýror usynǵan jaza baptyń sanktsııasyna saı kelgen. Sottalýshylar buryn isti bolmaǵan. Kelisimde kórsetilgen jazadan aýyr jaza berýge bolmaıdy. Baıandalǵan istiń negizinde sot aıyptalýshylardy kináli dep tanyp, olarǵa kelisimge sáıkes jazany taǵaıyndady. Úkim zańdy kúshine engen joq.
Aıta ketsek, buǵan deıin osy ortalyqtaǵy on shaqty balanyń «qyzylsha» dıagnozymen ınfektsııalyq aýrýhanaǵa túskeni habarlanǵan edi. Aýrýhanaǵa jetkizilgen balalardyń tórteýi kóz jumǵan edi.
