Sot Astanada oqýshyny qaǵyp ketken áıeldi «úıqamaqqa» alý sanktsııasyna qatysty túsinik berdi
ASTANA. QazAqparat - Astananyń Almaty aýdandyq №2 soty 25 mamyr kúni kámelet jasqa tolmaǵan balany qaǵyp, mert qylǵan S. esimdi áıeldi úıqamaqqa alý sanktsııasy berildi. Bul týraly Astana qalasynyń Almaty aýdandyq №2 sotynyń sýdıasy Nurlan Baıahmetov málim etti.
«Naqtyraq aıtqanda, Almaty aýdandyq ІІB tergeý bólimi QR QK 345-baby 3-bólimi boıynsha kúdikti S. esimdi azamatshany úıqamaqqa alý sharasyn sanktsııalaý týraly ótinish bergen. Bul ótinishke sáıkes, kúdiktige qatysty úıqamaqqa alý sharasyn qoldaný sheshimi qabyldandy. Mundaı sharany tańdaýǵa áıeldiń buryn qylmystyq jaýapkershilikke tartylmaǵany, al quqqy buzýshylyq abaısyzda jasalǵan sanatynda bolýy negiz boldy. Sonymen qatar, kúdikti eki jasar balany tárbıelep otyrǵany jáne ol júktiliktiń tórtinshi aıynda ekendigi de eskerilip otyr. Áıel buryn qylmystyq jaýapkershilikke tartylmaǵan, minezdemesi jaqsy, turǵylyqty meken-jaıy bar. Sot bul ótinishti kúdiktiniń, prokýratýra ókili jáne advokattyń qatysýymen qarastyrdy. Іs materıaldary qaralyp, barlyq boljam rastaldy. Sot bul ótinishti durys dep tanyp, mundaı shara qoldanýdy sanktsııalady. Ol úsh táýlik ishinde zańdy kúshine enedi», - dedi N. Baıahmetov.
Sýdıa aqparatyna súıensek, sot tyńdaýy bastalǵanǵa deıin kúdikti úıqamaqta bolady. «Oǵan dalaǵa shyǵýǵa (densaýlyq jaǵdaıyna baılanysty medıtsınalyq mekemelerge barýyn eskermegende), telefon arqyly sóılesýge, bóten adamdarmen kezdesýge tyıym salynady. Sot qaýlysyna sáıkes, tergeý organdaryna bul ýaqytta kúdiktiniń áreketterin baqylaý tapsyryldy», - dedi ol. 25 mamyrda kúdikti «Toıota Land Krýzer» kóligimen kámelet jasqa tolmaǵan, 2003 jyly týǵan jaıaý júrginshini qaǵyp, oqýshy oqıǵa ornynda kóz jumdy. Áıelge QR QK 345-baby 3-bólimi boıynsha aıyp taǵyldy. Onda 5 jylǵa deıin bas bostandyǵynan aıyrýy jazasy belgilengen.
