Sot «Astana EKSPO-2017» UK-nyń burynǵy departament basshysy Q.Úsenovti úıqamaqqa alýǵa sheshim shyǵardy
ASTANA. QazAqparat - Almaty aýdandyq №2 soty «Astana EKSPO-2017» Ulttyq kompanııasy» AQ qurylys departamentiniń burynǵy basshysy Qajymurat Úsenovti úıqamaqqa alý jóninde sheshim shyǵardy. Bul týraly Astana qalalyq sotynyń baspasóz qyzmeti habarlady. Qazirgi ýaqytta ol «EKSPO-2017» sharasynyń keńesshisi qyzmetin atqarýda.
Q. Úsenov 214 000 000 teńge kóleminde bıýdjettik qarajatty qoldy qyldy dep kúdiktelýde. Tergeý málimetteri boıynsha, 2014 jyldyń basynda Q.Úsenov «Southfork» kompanııasynyń atqarýshy dırektory S.Seıitovpen jáne «Astana EKSPO-2017» Ulttyq kompanııasy» AQ-nyń laýazymdy tulǵalarymen birge EKSPO-2017 kórmesin Astanada ótkizýge arnalǵan jáne olarǵa senip tapsyrylǵan iri kólemdegi qarajatty qaltaǵa basý maqsatynda qylmystyq jospar qurady.
Keıin Q.Úsenov «Astana EKSPO-2017» Ulttyq kompanııasy» AQ-nyń laýazymdy tulǵalarymen birge ol pıǵyldy iske asyrý úshin «Southfork» kompanııasyn ashyq tenderden jeńimpaz etip shyǵarady. 2014 jyldyń mamyr jáne qazan aılary aralyǵynda «Southfork» kompanııasy kórme qurylysy júrýi tıis jer telimin qorshaýǵa kirisedi. S.Seıitov materıaldyq baılyqqa kenelý maqsatynda aı saıyn akti jasaý barysynda jumys jáne materıal qunyn qasaqana joǵary kórsetip otyrǵan. Osy aralyqta úlken kólemde qarajat túsken jáne ol keıin bankten sheshilip otyrǵan. Qazirgi ýaqytta tergeý jalǵasýda.
