Sot arqyly bankrottyq rásimi qaryz 5,5 mln teńgeden asqanda iske qosylady

ASTANA. QazAqparat – QR Qarjy vıtse-mınıstri Erjan Birjanov sot arqyly bankrottyq rásimi qalaı iske asyrylatynyn aıtty, dep habarlaıdy QazAqparat tilshisi.

«Sot arqyly bankrot dep jarııalaý baǵytyna toqtalsaq, azamattar qaryzy 1600 AEK –ten asqan jaǵdaıda iske asyrylady (2023 jyly - 5 mln 520 myń teńge). Sot arqyly bankrottyq kezinde boryshkerdiń múlki saýdaǵa shyǵarylady. Atap aıtqanda, sot bankrottyǵy barysynda kredıtor boryshkerdiń jalǵyz turǵyn úıin osy baspana kepil nysanasy bolǵan jaǵdaıda ǵana alyp qoıýǵa quqyly. Odan túsken qarajat belgilengen kestege sáıkes kredıtorlar aldyndaǵy qaryzdy óteýge jiberiledi», - dedi Erjan Birjanov Ortalyq kommýnıkatsııalar qyzmetindegi baspasóz máslıhatynda.

Onyń aıtýynsha, alıment, adamnyń ómiri men densaýlyǵyna keltirilgen zııan boıynsha qaryzdar, qylmystyq quqyq buzýshylyqtar boıynsha zalaldy óteý, sondaı-aq sot sheshimi boıynsha óndirý alý maqsatynda bıýdjetke aýdarylatyn tólemder esepten shyǵarylmaıdy.

«Sot bankrottyǵy rásimin qarjy basqarýshylary júzege asyrady. Olardyń qataryna kásibı býhgalterler, zań boıynsha keńesshiler, aýdıtorlar, kiredi», - dedi vıtse-mınıstr.

Munymen qosa, jeke adamdardyń bankrottyǵy týraly zań aıasynda tólem qabiletin qalpyna keltirý qamtylǵan. ıAǵnı turaqty tabys bolǵan jaǵdaıda, sotta qaryzdy bólip tóleý múmkindigi (5 jylǵa deıin) eskerilgen. Qalpyna keltirý josparyn qarjy basqarýshysy birlesip ázirleıdi jáne sotta bekitiledi. Bul rásimniń artyqshylyǵyna toqtalsam, qaryzy bar adam «bankrot» sanatyna kirmeıdi.

Atap aıtqanda, bankrot dep tanylǵan adam 5 jyl nesıe ala almaıdy. Sonymen birge, 7 jyldyń ishinde ózin qaıtadan bankrot dep tanýǵa jatpaıdy. Olardyń qarjylyq jaǵdaıy bankrottyqtan keıin úsh jyl boıy tekseriledi.

Al tólem qabiletin qalpyna keltirý kezinde, mundaı saldar bolmaıdy.

Budan buryn habarlanǵandaı, qaryzy jabylmaǵan adamdar 2023 jyldyń 3 naýryzynan bastap bankrottyqqa ótinish bere alady.

Sottan tys bankrottyqqa toqtalsaq, bul rásimdi azamattar tek bankter, mıkroqarjy uıymdary jáne kollektorlyq agenttikter aldyndaǵy boryshtar boıynsha tıisti sharttarǵa sáıkes qoldana alady. Birinshiden, olardyń aldyndaǵy qaryzy 1 600 AEK-ten aspaýy tıis.

Jeke tulǵany bankrot dep taný tártibi qandaı? Kimder ózin bankrot dep jarııalaı alady? Onyń saldary qandaı bolmaq? Osy jáne ózge de suraqtarǵa tolyǵyraq jaýap alý úshin QazAqparat sarapshysynyń materıalyn oqı alasyzdar.