Sot arqyly bankrottyq rásimdegen azamattardyń múlki qalaı qorǵalady

NUR-SULTAN. QazAqparat – Boryshyn óteı almaǵany úshin sot arqyly bankrottyq rásimdegen azamattar árbir áreketin qarjylyq basqarýshylardyń nusqaýymen jasaıdy. Tulǵalardyń bankrottyǵyn rettetıin zań jobasyn tanystyrǵan Memlekettik kirister komıteti tóraǵasynyń orynbasary Qaırat Mııatov atalǵan protsedýranyń erekshelikterine toqtaldy, dep habarlaıdy QazAqparat tilshisi.

«Sot arqyly bankrottyqty qarjylyq basqarýshylar rásimdeıdi. Bul korporatıvtik bankrottyqty rásimdeý tásiline uqsas. Qarjylyq basqarýshylar quramyna bankrot ákimshileri, kásibı esepshiler, zańger keńesshiler, aýdıtorlar men advokattar kiredi. Sot arqyly bankrottyqty rásimdeý kezinde qarjylyq basqarýshylar kredıtordyń talaptarynan tizim jasap, boryshkerdiń ıeligindegi múlikter týraly aqparat jınaıdy. Osydan keıin múlikterdi túgendep, baǵasyn eseptep shyǵarady. Sol derekterdiń negizinde boryshkerdiń qarjylyq jaǵdaıyn esepke ala otyryp qorytyndy shyǵarady», - dedi komıtet ókili.

Aıtýynsha, sot arqyly bankrottyq rásimdegender de sottan tys bankrottyq rásimdegen azamattar sııaqty shekteýlerge jolyǵady.

«Olarǵa qaryz alý boıynsha kelisimder jasaýǵa, shetelge shyǵýǵa tyıym salynady. Al kredıtorlarǵa boryshkerdiń bank shottarynan aqsha óndirip alýǵa, múlikti óndirip alýǵa joldaýǵa, aıyppul, ósimpuldar esepteýge tyıym salynady. Boryshkerdiń múlkine qatysty sot jáne ózge organdardyń sot arqyly bankrottyq rásimdegenge deıin shyǵarǵan sheshimderiniń bári toqtatylady», - dedi Qaırat Mııatov.

Buǵan deıin habarlaǵanymyzdaı, zań jobasynda jeke tulǵanyń bankrottyǵyn rásimdeýdiń úsh joly usynylyp otyr. Olar: sottan tys bankrottyq, sot arqyly bankrottyq jáne azamattardyń tólem qabiletin qalpyna keltirý. Bul jerde boryshtyń kólemi men merzimi negizge alynady.