Sot Almatynyń burynǵy basqarma basshylaryn úı qamaqqa jiberýden bas tartty
ALMATY. KAZINFORM – Almaty qalalyq Josparlaý jáne ýrbanıstıka basqarmasynyń burynǵy basshysy Almashan Ahmetjanov pen jer qatynastary basqarmasynyń burynǵy bastyǵy Ardaq Samambetovtiń advokattary sýdıadan qorǵaýyndaǵy azamattardy úı qamaqqa jiberýin surady.
Sot otyrysy barysynda Ardaq Samambetovtyń qorǵaýshysy aıyptalýshyǵa qatysty bultartpaý sharasyn ózgertý týraly ótinish jasady. Sondaı-aq Almashan Ahmetjanovtyń advokaty qorǵaýyndaǵy azamatty qamaýǵa alý túrindegi bultartpaý sharasyn tańdaý protsesinde onyń densaýlyǵy eskerilmegenin aıtyp, úı qamaqqa aýystyrýyn surady.
«Qamaýǵa alý týraly bultartpaý sharasyn tergeý soty bekitken bolatyn. Qazirgi tańda ony ózgertýge negiz joq», - dedi sýdıa.
Eske salaıyq, 2023jyldyń 19 shildesinde Sybaılas jemqorlyqqa qarsy is-qımyl qyzmeti zańsyz qurylysqa ruqsat berip kelgen ýrbanıstıka basqarmasynyń basshysy ustalǵany týraly aqparat taratqan edi.
Ol jer ýchaskelerin berý jáne obektilerdiń qurylysyn kelisý kezinde laýazymdyq ókilettikterin asyra paıdalandy degen kúdikke ilindi. Máselen, jeke turǵyn úı qurylysyna arnalǵan jer ýchaskelerinde, nysanaly maqsatyna qaramastan jáne qurylystyń tyǵyzdyǵyn eskermeı, jekelegen qurylys kompanııalarynyń múddesi úshin 2020-2023 jyldary 3 kóppáterli turǵyn úı kesheniniń qurylysyn zańsyz kelisken. Memleketke 307 mln teńgeden astam somaǵa jer ýchaskeleriniń tólenbegen kadastrlyq quny túrinde zalal keldi.
Keıin mamandandyrylǵan aýdanaralyq tergeý soty Almashan Ahmedjanovty qamaýǵa aldy.
Almaty ýrbanıstıka basqarmasynyń basshysyna qandaı aıyp taǵylǵany týraly myna jerde tolyǵyraq aıtylady.
