Sot aldy tyńdaý: Aqtóbede anasynyń kepilde otyrǵanyn balasy habarlady
AQTÓBE. KAZINFORM — Aqtóbede E.Qaztýǵanovanyń kepilde otyrǵanyn balasy kórip, habar berdi. Ol sol kúni keshkilik úıine naǵashylarymen erip bardy.
Aqtóbede «Adam óltirý», «Bas bostandyǵynan zańsyz aıyrý», «Densaýlyqqa qasaqana aýyrlyǵy ortasha zııan keltirý» baptary boıynsha bastalǵan istiń basty sot talqylaýy 9 maýsym kúni saǵat 10:00–de ótedi. Sot otyrysyna qatysyp jatqan jábirlenýshiler oqıǵa bolǵan kúni ne kórgenin aıtyp berdi.
— Sol kúni emhanaǵa bardym. Tústen keıin sińlim Zınanyń jıeni maǵan habarlasyp, ájesiniń qońyraýlaryna jaýap bermegenin aıtty. Tústen keıin ózim de habarlasyp kórdim. Ol kezde kúıeý balamyz Baıǵanı ustap, «Zına telefonyn tastap ketti» dep aıtty. Bizdiń sol ýaqyt shamasynda keshki shaı ishetin ádetimiz bar edi. Baıǵanı jazǵy úıden qarap keletinin aıtyp, tutqany qoıdy. Biraq sodan soń ózi de baılanyssyz qaldy. Keshki jıenimiz taǵy da habarlasyp, ata-ájesimen sóılese almaǵanyn, úıge baratynyn aıtty. Men alańdap, «maǵan kelesiń, tamaqtanyp, birge baramyz» dedim. Maǵan keldi, tamaǵyn iship, sol úıge qaraı shyqtyq. Úıge kirsek tereze ashyq tur. Telefon ústel ústinde jatyr. Jazǵy úıge bardyq, ol esikti ashty. Bir aıaǵymen kirdi de jaryqty jaqqysy keldi. Bir kezde «Sen kimsiń?» dep aıqaılap jiberdi. Іshke kirmeı, biz ony súırep shyqtyq, sóıtip jan-jaqqa habaryn berdik, — dedi marqum Zına Shaımaǵambetovanyń apasy Dına Shaımaǵanbetova.
Onyń aıtýynsha, bala er adamnyń pyshaq ustap otyrǵanyn kórgen.
Marqum Baıǵanı Álıev pen Zına Shaımaǵanbetova birneshe jyl birge turdy. B.Álıev buryn quqyq qorǵaý salasynda eńbek etip, zeınetke shyqqan. 4 qyz ósirgen.
— Biz ómir boıyna bas bostandyǵynan aıyrylǵanyn qalaımyz. Mundaı adamnyń ómir súrýge qaqy joq. Biz tanymaıtyn edik. Ákem ol adamdy tanydy. Iá, qyzymyz jaqsy jigitpen tanysty dep aıtyp otyratyn. Úıge kelgenin de aıtty. Ákem sońǵy 7-8 jylda birge turdy. Ákem Qandyaǵashta polıtsııa qyzmetkeri boldy. Bıyl sáýir aıynda 75-ke tolatyn edi. Biz toıǵa daıyndalyp júrgenbiz. Eki ret obyr dertine shaldyǵyp, Túrkııada emdelip, aman qaldy. Osyndaı adam kelip, ómirin qıdy. Zına apamyz da keremet jan. Anamyzdyń ornyn baspaǵanmen óte jaqsy boldy. Ashyq boldy. Ákem bizge óte jaqsy tárbıe berdi, — dedi marqum B.Álıevtiń qyzy.
Aqtóbe oblystyq qylmystyq ister jónindegi mamandandyrylǵan aýdanaralyq sotynda búgin aıyptaý aktisi oqyldy. Onda aıyptalýshynyń kúni buryn bárin josparlaǵany, aldymen Z.Shaımaǵanbetovany 20 ret pyshaqtap, jertólege tastaǵany týraly aıtylǵan. Al marqum B.Álıevti uryp, keıin baltalap tastaǵan.
Eske salsaq, bıyl 13 qańtar kúni Aqtóbede er adam áıeldi kepilge aldy. Oqıǵa ornynda bolǵan úsh adamnyń ekeýi kóz jumdy. Bireýi aýrýhanaǵa tústi. Birden qylmystyq is qozǵalyp, tergeý júrdi. Kepilde bolǵan áıel birneshe kún aýrýhanada em qabyldady.