Sot aqtaǵan vıtse-mınıstr Shkarýpa memleketten 10 mln teńge ótemaqy óndirip alady

ASTANA. QazAqparat – Astana qalasynyń Esil aýdandyq soty Anatolıı Shkarýpanyń Qarjy mınıstrliginen moraldyq zalal ótemaqysyn óndirip alý týraly azamattyq isti qarady, dep habarlaıdy QazAqparat tilshisi.

Astana sottarynyń Facebook paraqshasynda jarııalanǵan málimetke sáıkes, talapker sot úkimimen qylmys jasaýǵa qatysqany dáleldenbeýine baılanysty kinásiz dep tanylǵan.

Sonymen qatar atalǵan úkimde aqtalǵan talapkerdiń qylmystyq isti júrgizgen organnyń zańsyz is-áreketinen kelgen zııandy óndrip alý quqyǵy kórsetilgen.

A.Shkarýpany 2018 jyly Bas prokýratýranyń jedel tergeý toby ustap, tergeý sotynyń sanktsııasymen tergeý ızolıatoryna qamaǵan edi.

2021 jyldyń 26 qańtarynda Qaraǵandy qalasy Qazybek bı aýdandyq soty A.Shkarýpany Qylmystyq kodekstiń 189-baby 4-tarmaǵy 2-tarmaqshasynda kódelgen qylmysty jasaýǵa kináli emes dep tanyp, qylmystyq quqyq buzýshylyqtyń bolmaýyna baılanysty aqtaǵan.

Sol jyly aqpanda Qaraǵandy oblystyq qylmystyq ister jónindegi sot alqasy birinshi saty úkimin ózgerissiz qaldyrdy.

«Sot talapty jartylaı qanaǵattandyrdy. Qarjy mınıstrliginen 10 mln teńge mólsherinde moraldyq zııan ótemaqysy óndirip alynady», - delingen taratylǵan aqparatta.

Sot sheshimi zańdy kúshine engen joq.

Eske sala ketsek, Bas prokýratýra Energetıka vıtse-mınıstri bolǵan Anatolıı Shkarýpanyń ústinen qylmystyq is qozǵady.

Oǵan jáne taǵy eki kúdiktige «Turǵyn úı-kommýnaldyq sharýashylyqty damytý qory» AQ Qaraǵandy oblysynyń Saran qalasynda jylý esepteý quraldaryn satyp alýǵa jáne ornatýǵa bólgen 215 mln teńgeni urlady degen aıyp taǵylǵan edi.

2021 jyldyń 26 aqpanynda Qaraǵandy qalasynyń Qazybek bı aýdandyq soty Anatolıı Shkarýpany aqtady.