Sot advokattyń Baqytgúl Hamenovany úı qamaýyna jiberý týraly ótinshin qanaǵattandyrmady

ATYRAÝ. QazAqparat – Atyraý oblysy ákiminiń orynbasary qyzmetin atqarǵan Baqytgúl Hamenova sot zalynan úı qamaqqa jiberilgen joq. Sot advokattyń aıyptalýshyny úı qamaýyna aýystyrý jónindegi ótinishin qanaǵattandyrmady, dep habarlaıdy QazAqparat.

Buǵan deıin Baqytgúl Hamenovanyń advokaty aıyptalýshyny úı qamaýyna aýystyrýdy suraǵan edi.

Alaıda sot advokattyń bul ótinishin qanaǵattandyrǵan joq.

Buǵan deıin 11 tamyzda Atyraýda oblys ákiminiń orynbasary bolǵan Baqytgúl Hamenovaǵa, Atyraý oblysy mádenıet, tilderdi damytý jáne arhıv isi basqarmasynyń basshysy Aqylbek Rysqalıev pen «Balqytý» JShS dırektory Ómirtaı Adamovqa qatysty sot ótip jatqanyn habarlaǵan edik.

Baqytgúl Hamenova men Aqylbek Rysqalıevtyń isi QR Qylmystyq kodeksiniń 366-babynyń 3-bóliginiń 3-tarmaǵymen tergelgen. Al, «Balqytý» JShS dırektory Ómirtaı Adamov QR Qylmystyq kodekstiń 367-babynyń 2-bóligimen tergeýge alynǵan.

Sotta Baqytgúl Hamenova ózine taǵylǵan aıypty moıyndamady. Onyń isine qatysty aıyptaý aktisi 55 betti quraǵan.

Endi sot otyrysy búgin, 12 tamyzda qaıta jalǵasty.

Eske sala ketelik, Baqytgúl Hamenova Atyraý oblysy ákiminiń orynbasary laýazymyna 2020 jyldyń 13 naýryzynda taǵaıyndalǵan. Bul taǵaıyndaýǵa deıin altynshy saılanǵan Parlament Májilisiniń depýtaty bolǵan.

Atyraý oblysy ákiminiń orynbasary qyzmetin atqarǵan Baqytgúl Hamenova Abaı eskertkishin ornatýǵa bólingen qarajattan para aldy degen kúdikke ilingen. Ol byltyrǵy jeltoqsan aıynda ustalyp, tergeý ızolıatoryna qamaýǵa alyndy.