Sot Ábilıazovtiń isi boıynsha sottalýshylardyń sońǵy sózin tyńdady

BTA bank tóraǵasynyń burynǵy orynbasary Jaqsylyq Jarymbetov pen banktiń burynǵy basqarma tóraǵasy Sádýaqas Mámesh sońǵy sózinde óz kinásin tolyqtaı moıyndady. «Sotqa deıingi jáne sot otyrysy kezindegi tergeýde jasalǵan qylmystardyń mehanızmderin ashýǵa kómektestim. Men 121 epızod boıynsha ózimniń kinámdi tolyǵymen moıyndaımyn jáne istegen qylmysyma qatty ókinemin»,-dedi J. Jarymbetov.

Ol Qazaqstanǵa óz erkimen qaıtyp oralǵanyn tilge tıek etti. Aıta ketelik, J. Jarymbetovtiń sotqa deıingi tergeýge bergen jáne basty sot otyrysynda aıtqan jaýaptary Muhtar Ábilıazovtiń kóptegen qylmysynyń betin ashyp berdi.

«Aǵymdaǵy jyldyń qańtar aıynda men Qazaqstan Respýblıkasynyń Túrkııadaǵy konsýlyna ótinish hat jazyp, óz erkimmen elge oralatynymdy jetkizdim. Qazaqstanǵa qaıtyp oralǵannan keıin tergeý bastalǵan alǵashqy kúnnen bastap-aq árbir epızod boıynsha óz kinámdi tolyq moıyndadym. Sotqa jasalǵan qylmystyń ártúrli mehanızmderin ashýǵa járdemdestim. Ábilıazov myrzanyń qylmystyq jelisin ashyp berdim. Ózimniń kásibı bilimimdi eskere otyryp, árbir keste men epızod boıynsha tolyqqandy túsinikteme berdim. Sotta búkpesiz barlyq shyndyqty aıtýǵa tyrystym jáne jetkilikti jaýaptar berdim»,-dedi taraptardyń sóz saıysynda Jaqsylyq Jarymbetov.

Sottalýshy óziniń sotqa bergen jaýaby Muhtar Ábilıazovtiń barlyq is-áreketterin barynsha keńirek ashýǵa múmkindik bergenin málim etti. «Men ózimniń túsinikterim arqyly tergeýge kóp paıdamdy tıgizdim dep oılaımyn»,-dep sózin aıaqtady Jaqsylyq Jarymbetov.

Óz kezeginde BTA banktiń burynǵy basqarma tóraǵasy Sádýaqas Mámásh te istegen qylmysyna ókinetinin aıtty. «Men qolymmen istegen qylmysymdy moınymmen kóterýge daıynmyn. Memlekettik aıyptaýshy taraptyń ustanymymen tolyq kelisemin»,-dedi sońǵy sózinde S. Mámásh.

BTA banktiń nesıeleý jónindegi eks-dırektory Qaırat Sadyqov óz kinásin moıyndaǵan joq. Soǵan qaramastan ol sottan ózin tolyq aqtaýdy surady.

Aıta ketelik, memlekettik aıyptaýshylar sottyq tyńdaý barysynda qylmystyq is boıynsha sottalýshylarǵa qansha jyl jaza suraıtynyn habarlaǵan bolatyn. Olar bas fıgýrant Muhtar Ábilıazovty - 20 jylǵa, Qaırat Sadyqovty - 18 jylǵa, Jaqsylyq Jarymbetov pen Sádýaqas Másheshti - synaq merzimimen shartty túrde úsh jylǵa bas bostandyǵynan aıyrýdy surady. Aıta keterligi, sot otyrysynyń basynda Jaqsylyq Jarymbetov óz kinásin tolyq moıyndady. Taraptardyń sóz saıysynyń aldynda Sádýaqas Mámásh te istegen qylmysyna ókinetinin jáne óz kinásin tolyqtaı moıyndaıtynyn málimdedi. Prokýrorlardyń Jarymbetov pen Mámeshke shartty túrde jazany suraýyna olardyń óz kinásin tolyqtaı moıyndaýy sebep bolǵanǵa uqsaıdy.

Prokýror BTA bankke keltirilgen shyǵyndy sottalýshylardan birdeı kólemde óndirip alýdy talap etti. Sonymen qatar, ol Qaırat Sadyqovqa qatysty bultartpaý sharasyn sot zalynan qamaýǵa alýǵa ózgertý týraly habarlady.

Qylmystyq is boıynsha sot úkimi aldyn-ala aǵymdaǵy jyldyń 2 maýsymy kúni saǵat 10.00-ge belgilendi.