Sot Abylaı Myrzahmetovtiń jazasyn jeńildetýden bas tartty

ASTANA. KAZINFORM – «Atameken» ulttyq kásipkerler palatasynyń burynǵy basqarma tóraǵasy Abylaı Myrzahmetov sotqa júginip, jazasyn jeńildetýdi suraǵan. Bul týraly Pavlodar qalasy №2 sotynyń baspasóz qyzmeti habarlaıdy.

- 2025 jylǵy 28 qańtarda Pavlodar qalasynyń №2 soty sottalǵan Abylaı Myrzahmetovtiń jazasyn ótelmegen bóligin neǵurlym jeńil, ıaǵnı bas bostandyǵyn shekteý túrindegi jazaǵa aýystyrý týraly ótinishhatyn qarap, jazasyn óteý merziminiń barlyq kezeńinde, onyń ishinde kúzetpen ustaý ýaqytyndaǵy tártibi týraly málimetterdi zerdelep, protseske qatysýshylardyń pikirin tyńdady, - delingen sot habarlamasynda.

Aıta ketsek, Qylmystyq kodekske sáıkes, sottalýshynyń minez-qulqynda oń ózgerister bolsa, jazany jeńildetý jaǵdaıy kózdelgen.

- Alaıda A.Myrzametovtiń minez-qulqynda oń ózgeris joq jáne jazasyn óteý daǵdyly jaǵdaıǵa jatady. Jazasyn óteýdiń barlyq kezeńinde sottalǵan adam eńbekke adal qatynasy úshin tek 1 kótermeleý aldy, bul zańǵa sáıkes sottalýshynyń negizgi mindeti. Qorytyndylar boıynsha sot jazanyń ótelmegen bóligin bas bostandyǵyn shekteý túrindegi neǵurlym jeńil jazamen aýystyrýǵa jetkilikti negizder tappady. Osyǵan baılanysty sottalǵan adamnyń ótinishhaty qanaǵattandyrýsyz qaldyryldy, - deıdi Pavlodar qalalyq sotynan.

Sot qaýlysy zańdy kúshine engen joq.

Eske sala keteıik, «Atameken» ulttyq kásipkerler palatasynyń eks-tóraǵasy Abylaı Myrzahmetov 2023 jyly 10 mamyrda ustaldy. 

2023 jeltoqsanda Abylaı Myrzahmetovtiń isi sotqa joldandy. 

Aıta ketsek, Abylaı Myrzahmetovtiń soty jabyq ótti. 

Elorda soty Abylaı Myrzahmetov 13,9 mlrd jymqyrdy degen úkimmen ony 5 jylǵa bas bostandyǵynan aıyrdy.