Sot 14 jasar jıhankezge saıahat jasaýǵa ruqsat berdi
ASTANA. Shildeniń 28-i. QazAqparat - Jer sharyn aınalyp shyǵyp, eń jas teńizshi atanǵysy keletin gollandııalyq Laýra Dekker saıahatqa shyǵýǵa sottan ruqsat aldy. Byltyr sot jas jıhankezdiń muhıtta jalǵyz júzýine tyıym salyp, ony memlekettik áleýmettik qyzmetterdiń qamqoryna ýaqytsha ornalastyrǵan edi, dep habarlaıdy VVS.
Laýranyń Jer sharyn aınalyp shyqqan eń jas ıahtashy ataný úshin óziniń segizmetrlik «Gýppı» ıahtasyn sýǵa túsirýdi armandaǵanyna biraz ýaqyt bolyp qaldy. Qazirgi ýaqytta bul rekord aǵymdaǵy jyldyń mamyr aıynda jer sharyn jalǵyz aınalyp shyqqan 16 jasar Djekssıka Ýotsonnyń ýysynda.
Jas teńizshi atanýdy armandaǵan Laýra Dekker 2009 jyldyń jeltoqsan aıynda sot qaýlysyn buzyp, Gollandııalyq Antıl araldaryna qashyp ketken edi. Ol sol jerden úıine qaıtaryldy.
Endi Mıddelbýrg qalasynyń soty 14 jasar jıhankezge jalǵyz júzýge salǵan tyıymdaryn alyp tastady. Laýranyń aıy ońynan týyp tur.
Laýra Dekker, ata-anasy jer sharyn aınala jetijyldyq saıahat jasap júrgen kezde, Jańa Zelandııa jaǵalaýynda ıahtada dúnıege kelipti. Ol óziniń alǵashqy ıahtasyna 6 jasynda qol jetkizgen jáne 10 jasynan bastap jalǵyz ózi júze bastady.
