«S.O.S»: Elorda oqýshylary nashaqorlyq qaýpin qoıylym arqyly sezindi
ASTANA. KAZINFORM – Elordada Mýzykalyq jas kórermen teatrynda jazýshy, dramatýrg Madına Omarovanyń «S.O.S» drama janryndaǵy qoıylymy kórermen nazaryna usynyldy.
Spektakl qalada «Zań jáne tártip» qaǵıdasyn, «Jas úmit» jobasyn, esirtki qylmysyna qarsy is-qımyl jónindegi keshendi jospardy jáne nashaqorlyqtyń aldyn alý jónindegi «Astana – esirtkisiz qala» aktsııasyn iske asyrý aıasynda sahnalandy.
Esirtki shyrmaýyna túsken jastardyń taǵdyry baıandalatyn qoıylymnyń basty rólindegi Aıbar jumys taba almaı qınalyp júrgende, esirtki satatyn jigitterge jolyǵady. Sóıtip, jeńil aqshanyń sońynan ketedi. Osylaısha uıyp otyrǵan bir otbasynyń shańyraǵy zardap shegedi. Qoıylymda basty keıipker Aıbar rólinde Bıbol Baıǵaraev, Abzal Arapov, Aıbarsha rólin Arýjan Baǵzat pen Arelana Amangeldıeva somdady. Al anasynyń rólin «Qurmet» ordeniniń ıegeri Maıra Omar men Aqnıet Zamzat oryndady.
Qoıylym barysynda esirtki tutynýdyń jeke tulǵaǵa, otbasyna jáne qoǵamǵa ákeletin qaýpi kórkem tilmen jetkizilip, jastarǵa ómirlik durys tańdaý jasaýdyń mańyzdylyǵy kórsetildi.
- Spektalde búgingi qoǵamdaǵy ózekti máselelerdiń biri qozǵalady. Oqıǵa bir otbasynyń aınalasynda bolǵan máselemen órbıdi. Olar qıyndyqqa tótep berýge tyrysady. Alaıda amaldyń, qarajattyń joqtyǵynan qıyndyqqa tap bolady. Basty maqsat – mundaı máseleniń aldyn alý, ony boldyrmaý. Kórermenge arzan aqshanyń artynda árqashan qıyndyq turatynyn jetkizý, - dedi spektakldiń qoıýshy rejısseri, mádenıet salasynyń úzdigi Aman Ǵumarov.
Astana qalalyq prokýratýrasy Sotqa deıingi tergep-tekserýdiń zańdylyǵyn qadaǵalaý jáne qylmystyq qýdalaý basqarmasynyń prokýrory Nurıslam Baltabekov jastardyń quqyqtyq saýattylyǵyn arttyrý jáne salaýatty ómir saltyna baýlý memlekettik saıasattyń basym baǵyttarynyń biri ekenin, bul maqsatty júzege asyrýda jas býynmen ashyq formattaǵy dıalog óz tıimdiligin kórsetkenin aıtady. Sondaı-aq nashaqorlyq máselesine Memleket basshysy Qasym-Jomart Toqaevtyń birneshe márte basa nazar aýdarǵanyn eske saldy.
- Osydan birneshe aı buryn Prezıdentimiz Qaýipsizdik keńesiniń otyrysynda esirtki jastardyń bolashaǵyna balta shaýyp, ult saýlyǵyna qater tóndiretinin atap ótip, nashaqorlyqtyń aldyn alý sharalaryn kúsheıtýdi, ásirese, bilim berý men aqparat salasynda keńinen jumys júrgizýdi tapsyrǵan bolatyn. Al búgingi Mýzykalyq jas kórermen teatrynyń «S.O.S» qoıylymy osy tapsyrma údesinen shyǵa alǵan sııaqty. Qoıylymdy tamashalaǵan 200 oqýshyǵa esirtki qasiretin túsindire alsaq, úlken jetistik bolmaq, - dedi Nurıslam Baltabekov.
Aıta keteıik, «S.O.S» drama janryndaǵy qoıylymy elorda prokýratýrasynyń, Astana qalalyq mádenıet jáne bilim basqarmalarynyń bastamasymen ótkizildi. Ony 220-dan astam mektep oqýshy tamashalady.