Sortańdanǵan egistikti qalpyna keltirýdi usynǵan jambyldyq jas ǵalym grantqa ıe boldy
TARAZ. QazAqparat - Jambyl oblysynyń Kásipkerler palatasynda 8 qazan kúni bastalǵan «Jas kásipkerler mektebi» jobasy aıaqtaldy, dep habarlaıdy QazAqparat.
«Jobaǵa 18 ben 29 jas aralyǵyndaǵy 65 adam qatysty. Bul joba jastardyń ınnovatsııalyq jáne kásipkerlik potentsıalyn oıatyp, jastardy kásipkerlikke baýlý, jas kásipkerlerdiń quzyrettik deńgeıin kóterýge baǵyttalǵan. Joba qatysýshylarǵa kásipkerlik negizderin, bıznes-jospar daıyndaýda konsýltatıvtik qyzmet kórsetý, bıznes-josparlardy qorǵaý alańyn uıymdastyrý, «Ideıa jármeńkesi» baıqaýyn ótkizýdi kózdeıdi», - delingen habarlamada.
Qatysýshylar oqý barysynda bıznestiń qyr-syryn meńgerip, bolashaqta júzege asyrǵysy keletin jobalaryn komıssııa aldynda qorǵap shyqty.
Jańashyldyǵy, áleýmettik mańyzy jaǵynan sáıkes keletin 4 qatysýshynyń jobasy iriktelip alyndy. Olar: «Qar-alma» taý-shańǵy kýrortynda týrıstik qyzmet kórsetý, «Jambyl oblysynyń tozǵan jáne sortańdanǵan jerlerinde fosfogıps jáne kóń negizinde bıomelıorant-ónimniń jańa túrin engizý», «Fetrden (kıizdiń bir túri) ázirlengen balalarǵa arnalǵan damytý kitapshalary men oıynshyqtaryn óndiretin shaǵyn tseh», «Plastık qaldyqtardy qaıta óńdeıtin shaǵyn tseh».
Komıssııa músheleriniń biryńǵaı sheshimimen 26 jasar Dáýlet Egemberdıevtiń jobasy birinshi orynǵa ıe boldy jáne Granttyq qarjylandyrý baǵdarlamasyna usynylatyn bolady.
M.H.Dýlatı atyndaǵy Taraz memlekettik ýnıversıtetiniń doktoranty Dáýlet Egemberdıev topyraǵy tozǵan egistik alqaptary men sortańdanǵan jerlerdi qalpyna keltiretin jańa bıemelorant oılap tapqan. Qazaqstanda aýyl sharýashylyǵy óndirisinde 2 mıllıon gektar egistik alqabynyń topyraǵy tozǵan. Tozǵan topyraqty tıimdi paıdalaný úshin bıomelıoranttar men organıkalyq tyńaıtqyshtardy qoldaný qajet.
«Sortańdanǵan jerlerde topyraqtyń qunarlylyǵyn qalpyna keltirýdiń tıimdi ádisteriniń biri jańa bıomelıorantty paıdalaný bolyp tabylady. Bul ádisti júzege asyrý úshin joly óte qarapaıym, energııa únemdeýshi, komponentter jergilikti shıkizat resýrstarynan quralǵan. Bir kılogramm bıomelıoranttyń ózindik quny -16 teńge», - deıdi Dáýlet Egemberdıev.
Onyń aıtýynsha bıomelıorantty paıdalanǵannan keıin egistik ónimdiligi 30-50 paıyzǵa deıin artady.
Kelesi qyzyqty joba «Fetrden ázirlengen balalarǵa arnalǵan damytý kitapshalary men oıynshyqtaryn óndiretin shaǵyn tseh» ashý. «Jas kásipkerlik mektebiniń» qatysýshysy Syrǵalym Toıbaeva qazirde dekrettik demalysta. Bala kútimimen úıde otyrǵan jas ana kıizden balalardyń aqyl-oıyn damytýǵa baǵyttalǵan túrli oıynshyqtar tige bastaǵan. Keıin balabaqshalar men ata-analar tarapynan suranys túse bastaǵanyn baıqaǵan ol tapsyrysqa oıynshyqtar men kitaptar tige bastaıdy.
«Biz quny 1 - 25 myń teńge aralyǵyndaǵy oıynshyqtar ázirleımiz. ıAǵnı, tútynýshynyń qaltasynyń qalyńdyǵyna baılanysty kez kelgen tapsyrysty qabyldaımyz» - deıdi jas kásipker.
Ol jas kásipkerler mektebiniń arqasynda túrli tyń ıdeıalarmen tanysyp, bolashaq bıznesmenge qajet qasıetterdi meńgeripti.
«Baıqaýda baǵyn synaǵan ár qatysýshynyń tyńǵylyqty daıyndalǵandyǵy kórinip tur. Esep-qısaptary, marketıngtik jaǵynan eseptelýi, shyǵyn men kiris, júzege asyrý orny tıimdi tańdalǵan, bıznes bastaýdaǵy barlyq jaıttar jan-jaqty qamtylǵan. Bul eń áýeli Kásipkerler palatasynyń bıznes-trenerdiń eńbegi», - deıdi, Jambyl oblysynyń Kásipkerler palatasynyń qarjylaı emes qoldaý bóliminiń basshysy Dıana Túkpetova.
