Sátbaev atyndaǵy kanaldan Astanaǵa deıin sorǵy-súzgi stansasyn salý: EPC-kelisimshartyna qol qoıyldy
ASTANA.KAZINFORM - Astana qalasynda Q.I.Sátbaev atyndaǵy kanaldan Astana qalasyna deıin sý tartqysh pen №4 sorǵy-súzgi stansasynyń qurylysyna arnalǵan EPC-kelisimshartqa saltanatty qol qoıyldy. Bul týraly Úkimettiń baspasóz qyzmeti habarlady.
Bul joba elorda úshin mańyzdy ınfraqurylymdyq bastamalardyń biri bolyp sanalady.
Іs-sharaǵa Qazaqstan Respýblıkasy Premer-mınıstriniń birinshi orynbasary Roman Sklıar jáne Qazaqstan Respýblıkasyndaǵy Qytaı Halyq Respýblıkasynyń Tótenshe jáne Ókiletti Elshisi Han Chýnlın myrza qatysty.
Q.I.Sátbaev atyndaǵy kanaldan Astana qalasyna deıin sý tartqysh pen №4 sorǵy-súzgi stansasynyń qurylysy – Astanany turaqty ári sapaly aýyzsýmen qamtamasyz etýge baǵyttalǵan strategııalyq joba.
Sý tartqyshtyń jalpy uzyndyǵy – 203,06 shaqyrym (eki jeli). Jobanyń júzege asyrylýy qalanyń kommýnaldyq ınfraqurylymyn jańǵyrtýǵa, sý tutynýdyń artýyna tótep berýge jáne áleýmettik-ekonomıkalyq damýǵa jaǵdaı jasaýǵa múmkindik beredi.
EPC-kelisimshartty daıyndaý qazaqstandyq jáne qytaılyq taraptardyń tyǵyz ózara is-qımyly negizinde, jobalaýdyń halyqaralyq standarttaryn, ekologııalyq qaýipsizdik pen qurylys tıimdiligin saqtaı otyryp júrgizildi. Qurylys jumystary 2025 jyldyń sáýir aıynda bastalady dep josparlanyp otyr.
China Energy International Group jáne onyń enshiles kompanııasy China Gezhouba Group Company Ltd. álemniń túrli óńirlerinde iri ınfraqurylymdyq jáne ınjenerlik jobalardy iske asyrýda mol tájirıbege ıe.
EPC-kelisimshartqa qol qoıý – qalalyq ortany ornyqty damytý jáne ınfraqurylym salasyndaǵy Qazaqstan-Qytaı áriptestigin odan ári nyǵaıtý jolyndaǵy mańyzdy qadam boldy.
Premer-mınıstr Petropavldaǵy sorǵy stantsııasyna barǵanyn jazǵan bolatynbyz.