Sórelerdiń keminde 50%-y qazaqstandyq ónimdermen toltyrylýy tıis — mınıstrlik

ASTANA. KAZINFORM — Sórelerdiń keminde 50 paıyzy qazaqstandyq azyq-túlik ónimderimen toltyrylýy tıis. Bul týraly Saýda jáne ıntegratsııa mınıstrliginiń keńeıtilgen alqa májilisinde vedomstvo basshysy Arman Shaqqalıev aıtty.

— Mınıstrlik jumysynyń taǵy bir mańyzdy baǵyty — taýarlardyń ekonomıkalyq qoljetimdiligin qamtamasyz etý. Bul baǵyt ónimderdiń baǵasy men sapasy boıynsha qol jetimdiligin ǵana emes, sonymen qatar otandyq ónimdermen saýdany yntalandyrýdy da qamtıdy. Otandyq óndirýshilerdi qoldaýdyń mańyzdy quraly mınıstrlikke sóre keńistigin taǵy 20 paıyzǵa keńeıtý boıynsha qarsy mindettemelerdi qoıa otyryp, paıyzdyq mólsherlemeni sýbsıdııalaý túrinde ishki saýda sýbektilerin memlekettik qoldaý fýnktsııalary alǵash ret berilgeni boldy.Endi sórelerdiń keminde 50 paıyzy qazaqstandyq azyq-túlik ónimderimen jáne keminde 20 paıyzy azyq-túlik emes taýarlarmen toltyrylýy tıis, — dedi mınıstr.

Onyń atap ótýinshe, tutynýshylardy aldaý boldyrmaý úshin ónimniń sapasy men ekspozıtsııasyna qoıylatyn talaptar kúsheıtildi. 

— Biz ishki saýda ınfraqurylymyn júıeli jańǵyrtýdy jalǵastyramyz jáne zamanaýı kóp formatty saýdaǵa kóshemiz. Strategııalyq maqsatymyz — 2029 jylǵa qaraı olardyń úlesin 70 paıyzǵa deıin jetkizý, — dedi ol.

Buǵan deıin Arman Shaqqalıev saýda mınıstrliginiń basym mindetterin ataǵanyn jazǵan edik.