Sórelerde týrısterge arnalǵan bólek baǵa engizile me – mınıstr jaýaby

ASTANA. KAZINFORM – Týrızm jáne sport mınıstri Erbol Myrzabosynov Úkimet otyrysynan keıin ótken baspasóz máslıhatynda jergilikti qonaqúıler men tamaqtaný oryndarynda týrısterge arnalǵan baǵa engizý máselesine pikir bildirdi.

- Shetelde eki túrli baǵa bolady. Biri – týrısterge arnalǵan, ekinshisi – jergilikti turǵyndarǵa arnalǵan. Qazaqstan osyndaı júıe engizile me, - dep surady jýrnalıst.

Mınıstr baǵany qoldan belgileý bolmaıtynyn aıtty.

- Qonaq úıler men tamaqtaný máselesine kelsek, bıznes baǵany ózderi qoıady. Mezgilge baılanysty ǵoı. Kóp óńirde týrıstik maýsym 2-3 aı ǵana. Qarajat jetispeýshiligine baılanysty baǵasyn qoıady. Bul endi halyqaralyq praktıka. Memleket ol jerge birden kirise almaıdy. Biz óz tarapymyzdan bıznesti qoldaý, ınfraqurylymdy jaqsartý esebinen básekelestikti arttyrý kózdelip otyr. Jergilikti ákimdikpen birge týrısterge qyzmet kórsetý standarttaryn engizip jatyrmyz. Bul servıs sapasyn kóterýge arnalǵan. Báseke paıda bolǵan saıyn baǵa turaqty bolady, - dedi Erbol Myrzabosynov.

Buǵan deıin Týrızm problemalaryn sheshýge jaýapty Jedel úılestirý keńesi qurylatynyn jazǵan edik.