Sorbulaqtaǵy tikushaq apaty: Sý qoımasynyń 50 paıyzy tekserildi

ASTANA. KAZINFORM — Joǵalǵan tikushaqty izdeý barysynda Sorbulaq sý qoımasynyń 50 paıyzy tekserildi. Bul týraly Úkimet úıinde ótip jatqan baspasóz máslıhatynda tótenshe jaǵdaılar vıtse-mınıstri Kegen Tursynbaev aıtty.

— 25 shildede Qorǵanys mınıstrliginen Otyrarda tikushaq joǵalǵany týraly habar aldyq. Sol sátten bastap, jedel izdestirý jumystaryn bastadyq. Berilgen baǵyt boıynsha tikushaqtarmen tekserdik. Sorbulaq sý qoımasyn qaradyq. Qazǵaryshtan alǵan sýretterden qaraǵanda janar-jaǵarmaıdyń ba izi boldy. Sorbulaq sý qoımasyna jaqyn jerden tikushaqtyń birneshe bólshegin taptyq. Sodan bastap shtab qurylyp, izdeý jumystary bastaldy, — dedi ol BAQ ókilderiniń saýalyna oraı.

Vıtse-mınıstr 10 kúnnen astam ýaqyt ótse de, ókinishke qaraı tikushaq tabylmaı jatqanyn aıtady. 

— Sorbulaqtyń 50 paıyzdaıyn tekserdik. Barlyq izdestirý jumysy Qorǵanys mınıstrliginiń basshylyǵymen ótip jatyr. Biz kúsh-quraldarymyzdy berdik. Qazir tań atqannan kún batqanǵa deıin izdeý jumystary júrgizilýde. Sorbulaq sýynyń tereńdigi 5-ten 25 metrge deıin jetedi. Asty batpaq. Tipti 1 metr tereńdik kórinbeıdi, laı, — dedi Kegen Tursynbaev.

Aıta keteıik, 25 shildede Almaty oblysynda josparly ushý barysynda Qarýly kúshteri Áýe qorǵanysy kúshteriniń EC-145 tikushaǵy radardan joǵalyp ketken. 

Bir kúnnen keıin joǵalǵan tikushaqtyń bólshekteri tabylǵany belgili boldy.