Sorbulaqta jınalǵan sý Almaty-Astana kúrejolyn basyp qalýy múmkin

ASTANA. QazAqparat - Jaýyn-shashyn mólsherden artyq jaýǵan ýaqytta Sorbulaq sý qoımasynda jınaqtalǵan sý Almaty-Astana kúrejolymen qosa kóptegen eldi mekenderdi basýy múmkin. Bul týraly búgin Májilistiń Ekologııa jáne tabıǵatty paıdalaný komıtetiniń keńeıtilgen otyrysynda Energetıka vıtse-mınıstr Talǵat Ahsambıev málim etti.

Eske sala keteıik, komıtet otyrysynda «Şýche-Býrabaı kýrorttyq aımaǵynyń sý kózderin sanatsııalaý jáne Sorbulaq sarqyndy sýlar jınaqtaýshy kólin rekonstrýktsııalaý» máselesi talqylanǵan bolatyn.

Energetıka vıtse-mınıstriniń aıtýynsha, ǵylymı-zertteý jumystarynyń nátıjesinde Sorbulaq cý jınaǵyshynyń qory tómendep, sý deńgeıi alańdatarlyq deńgeıge jaqyndaǵany anyqtalǵan.

«Jaýyn mólsherden tys kóp jaýǵan jaǵdaıda nemese dúleı daýyl tursa, nemese seısmıkalyq qaýipti aımaqta ornalasqandyqtan jer silkinisi bolsa, onda bógettiń jarylý qaýpi artady. Al ondaı jaǵdaı oryn alsa Almaty-Astana avtomagıstralimen qatar, birneshe eldi mekenderdi sý basýy múmkin», - dedi T.Ahsambıev. Onyń aıtýynsha, Almaty qalasynyń jyldam damýy, megapolıstegi halyq sanynyń kúrt ósýi Sorbulaq qoımasyndaǵy sharýashylyq-turmystyq jáne ónerkásiptik sý sarqyndylarynyń mólsherin arttyryp otyr. Al Sorbulaq sý jınaqtaǵysh qoımasynyń iske qosylǵanyna 40 jyldan asqan. Osyǵan oraı, mınıstrlik ókili sý qoımasyn jańǵyrtý jobasy úsh kezeńnen turatynyn atap ótti. Onyń sózine qaraǵanda, jobanyń birinshi kezeńinde uzyndyǵy 45 shaqyrym Sorbulaq sý burý arnalary men sý bólý qurylǵylaryn jańalaý kózdelgen. Bul rette jobanyń birinshi kezeń qurylysy 1 mıllıard 389 mıllıon teńgeni quraǵaly otyr. Al ekinshi kezeńde №1 jáne №2 bógetterin jańǵyrtý qarastyrylady, oǵan 413 mıllıon 885 myń teńge jumsaý kózdelgen. Úshinshi kezeńde Sorbulaq sý arnasynyń oń jaǵalaýyn jańǵyrtý jumystary qamtylmaq. Úshinshi kezeńde 1 mıllıard 28 mıllıon teńge bólý qarastyrylady.