Sorbulaq tragedııasy: áskerı ushqysh Bahtııar Erjigitovti týystary jer qoınyna tapsyrdy

PAVLODAR. KAZINFORM — Búgin Sharbaqty aýdany, Shaldaı aýylynan shyqqan ushqysh – Bahtııar Erjigitovti týǵan-týystary men jaqyndary aqtyq saparǵa shyǵaryp saldy. Bul týraly Pavlodar oblysynyń ákimdigi málim etti. 

— Sorbulaq kóli ústinde áskerı tikushaq kenetten baılanyssyz qalǵan sátte, bárimizdiń júregimiz bir úmit, bir kúdikpen soqty. «Aman bolar… oralar…» degen tilekpen alańdap, duǵada boldyq. Alaıda taǵdyrdyń jazýy basqa eken. Bahtııar — ata-anasynyń kóz qýanyshy, otbasynyń tiregi, eliniń erteńine úmit bolǵan azamat edi. Aqtóbedegi áskerı ýchılışeni, Talǵat Bıgeldınov atyndaǵy áskerı ınstıtýtty támamdap, Semeıde, keıin Jetigende qyzmet etti. Bort ınjeneri qyzmetinen maıor shenine deıin kóterildi. Jasy nebári 32-de edi. Biraq sol qysqa ǵumyrdyń ózi — erlikke, elge adaldyqqa toly boldy, — dep jazdy ákimdikten. 

Esterińizge sala keteıik, 25 shilde kúni Almaty oblysynda josparly ushý barysynda Qazaqstan Respýblıkasy Qarýly Kúshteri Áýe qorǵanysy kúshteriniń EC-145 tikushaǵy radardan joǵalyp ketken edi. 

Sol sátten bastap, jedel izdestirý jumystary bastaldy. Berilgen baǵyt boıynsha tikushaqtarmen tekserdi. Sorbulaq sý qoımasyn qaraldy. Qazǵaryshtan alynǵan sýretter arqyly janar-jaǵarmaıdyń izi tabyldy. Sorbulaq sý qoımasyna jaqyn jerden tikushaqtyń birneshe bólshegin tabyldy. Sodan bastap shtab qurylyp, izdeý jumystary bastaldy.

Al 9 tamyz kúni14 metr tereńdikte tikushaqtyń synyqtary men máıit anyqtalǵan bolatyn.

Keshe Sorbulaqta ekinshi adamnyń máıiti tabyldy.

— Ertis-Baıan jurtshylyǵy atynan jary Raýshanǵa, balalary Ahmad pen Aılınge, ata-anasy Sánıolla Erjigituly men Aıman Zadashqyzyna qaıǵyryp kóńil aıtamyz.  Sizderdiń qaıǵylaryńyz — barshamyzdyń ortaq qaıǵymyz. Bahtııar esimizde máńgi, júrekterge óshpesteı iz qaldyrǵan qaharman batyr. Jany jánnátta, nury peıishte shalqysyn, - dep jazdy oblystyq ákimdikten.