Sor basa beretin Azǵyr jolyna jańa tehnologııa qoldanylyp jatyr - oblys ákimi
NUR-SULTAN - ATYRAÝ. QazAqparat - Atyraý oblysyna qarasty Azǵyr eldi mekenine elektr energııasy jetkiziledi. Bul týraly búgin Ortalyq kommýnıkatsııalar qyzmetindegi baspasóz máslıhatynda Atyraý oblysynyń ákimi Nurlan Noǵaev aıtty, dep habarlaıdy QazAqparat tilshisi.
«Biz Azǵyr óńiriniń áleýetin kóterý úshin, sol jerde turyp jatqan 8 myńnan astam turǵynǵa jaǵdaı jasaý úshin jumys istep jatyrmyz. Ol Naryn qumynda ornalasqan. Bıyl jer qoınaýyn paıdalanýshy kompanııalardyń qoldaýymen 1-2 aıda ǵana 377 shaqyrym gaz jetkizildi», - dedi oblys basshysy.
Onyń atap ótýinshe, Azǵyr óńirine elektr jarǵyn jetkizý úshin jobalyq-smetalyq qujattama daıyndalyp jatyr. Sebebi atalǵan óńirdegi kóptegen eldi meken jaryqty Reseıden alýǵa májbúr. Aýa raıynyń qolaısyzdyǵynan elektr jelileri úzilgen kezde biraz ýaqyt eldi meken turǵyndary jaryqsyz otyrady.
«Qazirgi ýaqytta biz Batys Qazaqstan oblysynyń Bókeı ordasy aýdanyna tartylǵan talshyqty-optıkalyq ınternet jelisin Azǵyr óńirine jetkizý jóninde merdigerlermen kelistik. Osy arqyly Azǵyr óńiriniń búkil aýyldaryna ınternet jelisin jetkizý máselesin sheshemiz», - dedi oblys ákimi.
Nurlan Noǵaevtyń dereginshe, Azǵyr óńiri Naryn qumynda ornalasqandyqtan, 11 jol ýchaskesinde sor kezdesedi.
«Kóktem, kúz mezgilinde jaýyn-shashyn saldarynan turǵyndar joldan óte almaı qalyp jatady. Jol qatynasy qıyndaıdy. Osy máseleni sheshý úshin kúrdeli 11 jol ýchaskesinde jańa tehnologııalarmen jol salyp jatyrmyz. Ol oń nátıjesin berse, joldy ary qaraı keńeıtý máselesimen aınalysamyz»,- dedi óńir basshysy.
