Sooronbaı Jeenbekov Nursultan Nazarbaevty Bishkekke resmı saparmen kelýge shaqyrdy
«Bizdiń elderimiz arasynda dıplomatııalyq qarym-qatynas ornaǵan kúnnen bastap shırek ǵasyrdyń ishinde ekijaqty ózara is-qımyldy jolǵa qoıý boıynsha úlken jumys atqaryldy. Teń quqylyq, ózara tıimdilik jáne bir-biriniń ishki isine aralaspaý ustanymdary negizinde elderimiz arasyndaǵy dostyq, tatý kórshilik jáne strategııalyq seriktestik qarym-qatynasty belsendi nyǵaıtýǵa nıettimiz. Men Nursultan Ábishulyn Qyrǵyzstanǵa resmı saparmen kelýge shaqyrdym. Atalǵan sapar aıasynda Qyrǵyzstan men Qazaqstannyń joǵary memleketaralyq keńesiniń kezekti otyrysyn ótkizý josparymyzda bar», - dedi ol Aqordada Elbasy Nursultan Nazarbaev ótken shaǵyn jáne keńeıtilgen quramdaǵy kelissózderden keıingi birlesken málimdeme barysynda.
Sonymen qatar Sooronbaı Jeenbekov Qazaqstan Prezıdentin 2018 jyldyń qyrkúıek aıynda Ystyqkól jaǵalaýynda ótetin úshinshi Dúnıejúzilik kóshpeliler oıynyń ashylý saltanatyna shaqyrǵanyn aıtty.
«Kelesi jyly Qyrǵyzstan uly qyrǵyz jazýshysy Shyńǵys Aıtmatovtyń 90 jyldyǵyn atap ótedi. Qazaqstan tysqary qalyp qoımaı, atalǵan dataǵa arnalǵan merekelik is-sharalarǵa belsene qatysady dep úmittenemin. Óıtkeni, qazaqstandyqtar atalǵan kórnekti qalamgerdiń shyǵarmalaryn jaqsy kóredi jáne oqıdy», - dedi Qyrǵyz Prezıdenti.
