Sooronbaı Jeenbekov qyrǵyz halqyna taǵy da úndeý jasady
BІShKEK. QazAqparat – Qyrǵyz Respýblıkasynyń Prezıdenti Sooronbaı Jeenbekov eldegi qalyptasqan jaǵdaıǵa baılanysty qyrǵyzstandyqtarǵa taǵy da úndeý jasap, saıası dıalogqa daıyn ekendigi týraly málimdedi. Bul týraly QazAqparat Qyrǵyz Prezıdentiniń baspasóz qyzmetine silteme jasap habarlaıdy.
Sooronbaı Jeenbekov óziniń kezekti úndeýinde keıbir saıası kúshterdiń áreketi saldarynan sońǵy úsh kúnde elde saıası daǵdarys bastalǵanyn aıtty.
«Barlyq qyrǵyzstandyqtar saıası aýyr jaǵdaıdy bastarynan ótkizýde. Men osy jaǵdaıdy retteý týraly sizderdiń talaptaryńyzdy tolyq túsinemin. Men Prezıdent retinde daǵdarystyq máselelerdi sheshý baǵyttarynda barlyq kúsh-jigerimdi salatyn bolamyn. Osy maqsatta túrli saıası kúshtermen jeke kelissózder ótkizemin. Aıta keteıin, qazirge deıin jaǵdaıdy retteý úshin bir de bir tarap kelissózder júrgizetin biryńǵaı alań usynǵan joq. Sondaı-aq, túrli laýazymdy tulǵalardy qyzmetten bosatý jáne taǵaıyndaý protsesin zańdastyrý qajet», delingen Sooronbaı Jeenbekovtiń kezekti úndeýinde.
Eske salaıyq, jeksenbi, 4 qazan kúni Qyrǵyzstanda Jogorký Keneshke depýtattardy saılaý ótti. Depýtattyq mandatqa 16 partııa úmitkerlik etti. Daýys berýdiń aldyn ala málimeti boıynshy, 7% mejeni 4 partııa eńserdi.
Al, 5 qazan kúni saılaý nátıjesine kóńili tolmaǵan bir top adam ortalyq alańda mıtıng uıymdastyryp, odan keıin Aq úıge bettedi. Olardy tarqatý úshin mılıtsııa kóz jasaýratatyn gaz, sýatqysh jáne gaz-shýyldy qurylǵylar qoldanǵan. Bishkek ýaqytymen saǵat 22.00-degi málim boıynsha, aýrýhanaǵa zardap shekken 16 adam jetkizilgen. Keıingi málimet boıynsha, zardap shekken adamdar sany 911-ge jetti.
Eldiń Іshki ister mınıstrligi mıtıngti uıymdastyrýshylar men partııa basshylaryn óz jaqtastaryn úılerine qaıtarýǵa shaqyrdy.
6 qazanda Qyrǵyz Respýblıkasynyń Prezıdenti Sooronbaı Jeenbekov eldegi saıası jaǵdaıǵa baılanysty málimdeme jasady.
