Sooronbaı Jeenbekov Qazaqstan men Qyrǵyzstan arasynda qandaı qujattarǵa qol qoıylatynyn aıtty
«Búgin sapar aıasynda (QR Prezıdentiniń Qyrǵyzstanǵa sapary - red. eskertýi) Joǵarǵy memleketaralyq keńestiń 5-otyrysyn ótkizip jatyrmyz. Biz qazir ǵana Qasym-Jomart Kemelulymen shaǵyn formatta kelissóz ótkizdik. Bizdiń kelissózderimiz ádettegideı baýyrlastyq jáne ózara túsinistik rýhynda ótti», - dedi keńes otyrysyn ashqan Sooronbaı Jeenbekov.
Qyrǵyz Prezıdenti Qazaqstannyń Memleket basshysymen ekijaqty yntymaqtastyqtyń birqatar mańyzdy máselesi talqylanyp, eki eldiń ózara is-qımylyndaǵy basty máseleler boıynsha ýaǵdalastyqqa qol jetkizilgendigin aıtty. Olardy júzege asyrýdyń naqty tetikteri anyqtalǵanyn atap ótti.
«Bizdiń kelissózderimiz Qyrǵyzstan men Qazaqstan arasyndaǵy qatynasty damýdyń jańa sapaly deńgeıine kóteretindigine senim bildiremin», - dedi ol.
Sonymen qatar Qyrǵyzstan Memleket basshysy strategııalyq seriktestik jáne odaqtastyq qatynas munan ary da eki el halqynyń ıgiligi úshin nyǵaıa túsetindigine senim bildirdi.
«Búgin biz birqatar ekijaqty qujatqa, Joǵarǵy memleketaralyq keńestiń qorytyndy sheshimine, birlesken deklaratsııaǵa, 2020-2022 jyldarǵa arnalǵan elderimizdiń arasyndaǵy yntymaqtastyq jónindegi keshendi baǵdarlamalarǵa jáne basqa da qujattarǵa qol qoıamyz», - dedi Qyrǵyz Prezıdenti.
