Sooranbaı Jeenbekov: Uly dala - ata-babalarymyzdyń tarıhı taǵdyry jáne urpaqtyń keleshegi

NUR-SULTAN. QazAqparat - Uly dalada memleketterimiz qurylyp, elderimiz ultqa aınaldy. Bul týraly Qyrǵyz Prezıdenti Sooranbaı Jeenbekovtiń elordada ótip jatqan «Uly dala» ІV gýmanıtarlyq ǵylymdar forýmynyń qatysýshylaryna joldaǵan quttyqtaýynda aıtyldy, dep habarlaıdy QazAqparat tilshisi.

«Qurmetti forýmǵa qatysýshylar! Sizderdi «Uly dala» ІV gýmanıtarlyq ǵylymdar forýmynyń ashylý saltanatymen shyn júrekten quttyqtaımyn. Túrki órkenıeti adamzat tarıhynda ózgeshe ról oınady. Bul máseleni zertteýde belgili oqymystylardyń, ǵalymdardyń, elaralyq uıymdardyń atqaryp otyrǵan mıssııasy aýqymdy. Innovatsııalyq ónege men ǵylymı baılanystardy shyńdaý, ıdeıalarmen almasý, aktýaldy máselelerdi sheshýdiń baǵytyn kórsetýge baılanysty aımaqtyq jáne jahandyq mándegi jumystar kún tártibindegi ózekti másele. Uly dala - bul ata-babalarymyzdyń tarıhı taǵdyry jáne urpaqtyń keleshegi», - dedi Qyrǵyz Prezıdentiniń quttyqtaý hatyn oqyp bergen atalmysh el basshysynyń keńesshisi Sultan Raev.

S.Jeenbekov Uly dalada memleketterimiz qurylyp, elderimizdiń ultqa aınalǵanyn atap ótken. «Halyqaralyq Túrki akademııasy ótkizip jatqan kezekti forýmnan jańa zamannyń ıdeıalaryn kútemiz», - delingen quttyqtaý hatta.

Eske sala ketsek, elordada «Uly dala» ІV gýmanıtarlyq ǵylymdar forýmy ótip jatyr. Shara «Túrki órkenıeti: túp tamyrynan qazirgi zamanǵa deıin» taqyrybyna arnalyp otyr. Forýmda qazaqstandyq ǵalymdarmen birge Eýropa, Azııa men Amerıka qurlyǵynyń 21 elinen 250-ge jýyq tanymal ǵalymdar men belgili memleket, qoǵam qaıratkerleri qatysýda.